數碼影音：
𠝹女必備熊仔MP3機唱情歌

MP3Player發展至今，嚟嚟去去都不外乎加入收音、錄音等功能，除咗鬥型鬥平外，似乎已經冇乜發展空間。今日介紹呢款可謂創意爆晒燈，因為呢隻並非普通玩具熊咁簡單，真真正正係一部MP3Player，外形得意趣致重可以聽埋歌，送畀女朋友或細路仔，肯定都咁受。
記者、攝影：徐影龍　
ImgaeGirl：小慧

熊仔賣相夠抵死
呢款MP3Player最抵死係個外形，玩手抱式熊公仔Feel，造型及剪裁都做得唔錯，軟綿綿攬落好舒服，尤其係圓碌碌身形及得意表情，十足十《AI人工智能》入面隻泰迪咁可愛，唔似其他MP3Player咁冷冰冰，透過內藏嘅MP3Player，最啱用嚟播古仔𠱁小朋友瞓覺，又或博取心儀對象嘅歡心。
另一得意地方係所有按掣均設在熊仔腳底，大大粒好盞鬼。起初筆者以為隻熊仔軟綿綿，啲掣都唔慌好㩒，點知經測試後，發覺觸感頗佳，毋須用力㩒都得，原來內裏採用MicroSwitchButton，能準確偵測眾多按掣，就算小朋友細細力都冇問題。

唱歌秘密內置MP3機仔
講穿咗其實熊仔內置一部流動式MP3Player，插線後便可透過熊仔控制部機，而聲音輸出則設喺熊仔「胳肋底」，唔會太礙眼，除接駁耳筒欣賞歌曲外，亦可接駁一般電腦喇叭出聲，變成熊仔識得唱歌咁，相當之得意過癮。
至於機能方面則只算一般，除播放、暫停、搜曲外，機內並不設目前大熱嘅收音、錄音等功能，略嫌有所不足，不過諗深一層，女孩子或小朋友都唔會要求咁多功能喇。稍為安慰係設有Equalizer調校，抱括提供Normal、Classic、Jazz、Pop及Rock等五種音場環境，配合唔同歌曲可以有唔同嘅變化。

留意不設內置記憶體
跟機附有兩隻安裝磁碟，用作安裝抄歌程式之用，基本上安裝上並冇難度，不過要注意係安裝70%後要換入第二隻磁碟先得。程式只供抄歌之用，並冇提供SoundTrack轉MP3功能，用家需自行下載相關軟件。
要留意係機內不設任何記憶體，只有一條SmartMediaSlot，錄歌要自行購買SM卡，買熊仔前記得要預埋買記憶卡嘅錢，幸好目前市面SM卡賣價非常低，32MB（約可錄8首歌）只係賣$110，想聽多啲可以買64MB，賣價都只係$210，買熊仔時記得買埋記憶卡，免得收禮物一方得物無所用，空歡喜一場，更進一步，自然係體貼地下載一批對方的心水冧歌。

記者意見：
抵讚：外形趣致夠吸引，賣價亦算可接受。
要彈：齋機外形一般，不設屏幕唔夠方便。

ANA電腦（27700137）
旺角電腦中心319號舖