香港葯業（182）配股一事，在停牌兩日後，以講唔掂數收場。噚日復牌一度抽高，但最終下跌4.35％，收66仙，成交量多過未停牌之前，走勢似乎不妙。
小初問經紀陳，上次話幕後特登壓低股價，以便同芬佬講數，但結果傾唔掂，股價又再跌，似乎低處未算低，係咪幕後無力再挽？經紀陳解釋唔到，就賴個市唔就，今次真係唔知點收科。
另外，小初提過早前有唔少外資大行推介TCL國際（1070），雖然股價見唔到大升，但都冇咩跌過，喺目前咁差嘅市況，表現算係咁，證明家陣大行報告都重Sell得吓。
今次又有大行推介TCL嘅行家創維數碼（751），主要話大陸彩電減價戰緩和，同埋公司削減成本奏效，所以有得諗。
小初覺得創維久唔久就有負面消息，而且透明度又較TCL為低，產品仍以彩電為主，唔似TCL有搞手機生意，相比之下，都係TCL吸引啲。
慕容小初