美股大升之後，回一回氣，港股個勢本來已弱，升市冇反應，跌市就跟到足，恒指終於跌穿9000點大關，收市8984，大跌125點，但成交唔多，只得61億元。港股短期表現跟外圍，若美股果如所料重係處於反彈期，則港股在8800至9000點亦應有一守之力，甚至出現一次中期性反彈。
噚日大市跌咁多，主要係受長和系拖累，長實（001）跌2.1元，和黃（013）跌1.6元，同跌穿911低位後，再創新低。和黃屋漏兼逢連夜雨，在英國推出3G，前途未卜，成盤生意已被合作夥伴大幅減值，加上發債又要擱置，雖然和黃唔係好等錢使，但電訊行業債券冇人吼，在在反映市場對電訊業睇淡嘅程度，影響和黃股價大幅回落。
壞事講完，睇番和黃股價，已經落到好近超賣水平（9RSI21.9），長實好啲（22.5），雖然跌勢未止，但再跌落去，短期見底的機會亦愈來愈大，一次較大型的反彈，隨時會出現，外圍回升或帶來反彈動力，至於和黃推出3G，若然市場反應比預期為佳，都可能會係市場意料之外的好消息。
長實大跌，有一半原因係受和黃所累，若然樓市真係回穩，長實反彈嘅表現應該優於和黃。9月24日長實跌到49.2元低收，9RSI18.5，噚日收46.7元，9RSI22.5，好大機會形成高低腳底部及背馳，若然確認，則初步反彈目標可見55元，亦即8月徘徊區底部及50日線水平。
早前瑞銀華寶發表研究報告指出，目前地產股的股價表現，已反映樓價再跌20%至25%，報告發表之後，長實已再跌多6%，若然華寶估計冇錯，而樓市又在政府救市的大前提下得以轉穩的話，則地產股現水平股價確屬跌過龍。事實上，在過去兩個禮拜，主要地產股的新地（016）和恒地（012），都已有較強勢的表現。大市跌定之後，博反彈，呢3隻大地產股都可以考慮。
在眾多大銀行中，恒生（011）最唔受地產市道影響，股價表現亦比大市強，80元係支持位，跌穿則可見75元，若以收息為出發點，在80元至75元可分批吸納，有6.5厘至7厘息，已好揸得過。
郭兆誠