富家小姐話，佢對我冇嘢，
亦冇打算同我搞咩，
叫我千祈唔好諗歪，
佢只係欣賞我某方面嘅嘢；
佢話，佢想玩我條嘢！
我話，阿靚姐阿靚姐，
我希望你唔係撞邪，
我呢啲平價粗嘢，
點值得你隻貴手玩呢？
講真，你欣賞我咩呢？
富家小姐話，佢欣賞我簡單，
欣賞我冇玩馬冇玩車，
獨沽一味玩自己條嘢，
玩到快感好似山泥傾瀉；
佢話，佢都想試吓玩我條嘢！
我話，阿靚姐阿靚姐，
我唔係想做托手踭者，
但係我只得呢一條嘢，
借畀你，咁我玩咩？
你自己去買條啦，好平啫！
富家小姐話，佢點知去邊度買唧，
佢係都要我嗰條嘢，
因為見我玩得咁精采：
揸住條嘢，一拉一扯，
條嘢就變成粒星！
再扯兩扯，條嘢又變成丫叉，
可將「碼子」發射！
就算食咗幾粒「偉哥」，
都冇我玩得咁好嘢！
富家小姐，佢開始向我詐嗲，
佢開始撲前亂拉亂扯！
哇，我怕佢扯斷我條嘢，
惟有大叫：「咪再扯！
我呢條嘢，送畀你嘞，阿靚姐！」
於是將我玩緊嗰條橡筋箍，送咗畀佢。
唉，富家小姐，
橡筋箍，一蚊一盒啫，
咁都唔肯自己去買，真羞家呢！
（補白：橡筋箍，我認為是最便宜又最好玩的玩具之一。另一又cheap又好玩的玩意，就是「自己」，不過不要玩得過份，把自己玩死。）