美股杜指周二晚大幅反彈346點，周三晚出現回吐，本屬十分正常，但尾市跌勢轉急，則可能同一宗烏龍盤有關。尾市有間大行接到一個400萬美元S&P成份股沽盤，但經紀㩒錯40億美元，沽盤一出，當堂嚇到成個市場震晒，雖然有關經紀即時發覺取消，但已沽出6.22億美元貨值。美股近排已經夠晒弱，重出現埋呢類無妄之災，真係屋漏更兼逢夜雨，杜指最後跌183點，收7755。
杜指自從9月19日跌穿8000關後，一直無法重返其上，短期可能要再下試本周一低位7460，在獲得支持後，才會有較大反彈；跌穿則下試7000關。
港股噚日追隨外圍跌勢，9000關宣告失守，盤中低位8915距911事件後低位8894，僅差21點，尾市跌幅略為收窄，最後收8984，跌125點。
港美股市大超賣，雖在弱勢之下，仍會隨時出現反彈。恒指短期若跌至8600附近，可提供較大反彈空間，總好過現時8900附近反彈，卻不易升破9000至9400阻力。
滙豐（005）80元終宣告失守，去年9月28日滙豐有一個76.50元至78元的上升裂口，若中間落墨，回補部份裂口，滙豐可能跌至77元附近便有反彈，不過84元阻力十分大，相信不易升破。
趙飛雲開始留意恒指及主要藍籌的Call輪，早作部署迎接下一個較大的反彈升浪。現階段不宜再追買Put輪，讀者若有Put輪宜分段獲利，鎖住利潤。
趙飛雲