港股終於連9000關口亦失守，不過都係預料中事。噚晚，美國大行貝爾斯登曾錯誤輸入40億美元沽盤，導致美股周三晚大跌，阿虎重以為噚日會有一輪挾倉盤，令港股反彈，點知外圍標普期指繼續下滑，恒指反彈無力。外電話貝爾斯登嘅錯盤只做成6億幾美元，而且已經做足對沖，好友想借呢個消息挾淡倉，相信好困難。新一季盈富（2800）推出6.2億個單位後，至今只售出200萬個單位，似乎大戶對後市仍十分審慎。
港股推出新一季盈富銷售冷清，地鐵（066）股價亦唔好過，可能會好快跌破散戶認購價8.88元。地鐵噚日雖然跟隨公用股逆市上升，不過政府日後將地鐵地產項目發展權收回，盈利將大幅減少。與九鐵合併是地鐵唯一利好因素，最終都要睇吓合併條件。阿虎認為兩鐵合併，係港府明醒地鐵股東，平息佢哋嘅怨氣。
地鐵股民嘅怨氣點都唔及電盈（008）股民厲害，電盈噚日再跌6.3%，收報1.04元。睇個勢，電盈隨時會跌穿１元，早前小小超都有象徵式入市吸納打吓氣，噚日據講亦有咁樣做，可惜收效不大。電訊商打輸官司，可能要嘔番多收嘅10元隧道費，將影響流動電訊商收益。Sunday（866）大挫6.8%，收9.4仙。數碼通（315）則逆勢倒升2%，收8元，市傳因有大戶增持。
芬佬噚日繼續掟長和系，長實（001）跌4.3%，收46.70元；和黃（013）跌3.6%，收42.80元。據聞已經有對沖基金入市撈底，不過企圖不明，唔知係咪想入定長實炒除息。
其實NTTDoCoMo為3G減值撥備已屬預期之內，但和黃突然終止發債就比較奇怪，難免有人對長和系嘅信貸方面作出諸多揣測。
阿 虎