英皇女子組合Twins雖然大受歡迎，不過佢哋嘅勁敵EMI九人女子組合Cookies氣勢如虹，未知係咪因為咁，Twins近排都諗住招募新成員，實行以新陣型迎戰九餅女。
最近有一本雜誌搵咗啲男女參加Twins新成員招募，而Twins嘅經理人霍紋希（Mani）之前都有睇過參賽者嘅相片，Mani接受雜誌訪問時話新成員個樣要青春同有時代感，而外形方面要同蔡卓妍（阿Sa）同鍾欣桐（阿嬌）接近。
不過，Twins嘅身材都平平無奇，相信將來嘅新成員都應該係「平胸一族」，同埋講嘢可能低B啲，咁樣先同佢哋啱傾。
Mani噚日喺電話度話：「公司都幫Twins搵緊新成員，有雜誌幫手招募，多個渠道都幾好，如果啱用，我哋都會考慮吓。」
近期娛樂圈鬼咁多嘢發生，單單新聞上晒港聞頭條。周海媚噚日同一班女性朋友走去灣仔演藝睇歌舞劇《SingingInTheRain》。
問周海媚對謝霆鋒還押監房點睇？佢話唔識謝霆鋒，唔知點講。咁改問佢對Beyond成員葉世榮女友倒斃浴缸嘅睇法？佢又話唔認識對方，唔方便評論！咁又係嘅，周小姐𠵱家喺娛樂圈都唔係咁活躍，點會識得新一代嘅年輕偶像喎！
半唐番男星自從同鬼妹M小姐分手後，似乎一直未有新歡，但原來佢早排已經有新女友L小姐，對方亦係鬼妹，又係新晉模特兒，個樣同氣質重有少少似M小姐。
不過，最搞鬼係當初半唐番同M小姐拍拖，係女方做主動，𠵱家佢同L小姐又係女方發動追求攻勢，L小姐花咗一個月時間先將半唐番追到手。原來半唐番一向都唔主動追女仔，皆因佢享受被追求嘅感覺，唔使嘥心機追女仔喎！
蓋鳴暉、羅慧娟（娟妹）都係十月壽星女。噚日佢哋喺電視城出席「十月星辰」活動，蓋鳴暉噚日正日生日，星期日會喺尖沙嘴擺十圍壽宴，阿一鮑魚一哥送咗個水晶鮑魚畀佢做禮物。至於娟妹每年生日願望都係身體健康，佢話健康最緊要，冇健康有錢都冇用，如果加埋可以拍到一部代表作就最完美。
精靈仔同佢個內地女友拍咗拖已經幾年，大陸妹對精靈仔亦都一往情深，但兩個人長期分開兩地，精靈仔就梗係不甘寂寞啦！加上精靈仔鍾意周圍識女仔，佢最叻就係用手提電話發短訊，講吓甜言蜜語，總之一日一個。呢招唔得嘅話，佢重識借人把口傳情達意，精靈仔會搵佢啲豬朋狗友一齊做戲，由佢啲朋友出面同女仔講，話精靈仔幾咁掛住佢。大陸妹就梗係知佢啲嘢，不過佢又唔捨得精靈仔，惟有繼續啞忍。
陳百強已經逝世咗九年，佢生前所屬嘅華納唱片公司，喺倉度發現咗陳百強嘅原聲帶，入面有佢講嘢，經過剪輯，將會收錄喺唱片公司幫佢喺月底推出嘅紀念唱片入面。
陳百強嗰段聲帶嘅內容，主要係講《等》呢首歌原本係佢同徐小鳳合唱，不過因為版權問題，結果無緣合唱。經過重新混音嘅《等》噚日已經派咗上台，而華納巿場總監黎智傑噚日亦有到陳百強墳前拜祭。
鄭少秋（秋官）噚日一支公喺中環德成大廈出現，由於幢樓有唔少診所，所以馮仁昭以為秋官唔舒服要睇醫生。不過，秋官就話只係嚟呢度探朋友喎。而早前有報道話秋官已經入咗紙買跑馬地禮頓山，但噚日秋官口口聲聲話冇呢件事，不過馮仁昭再問佢係唔係上個禮拜去咗收樓時，秋官就漏口風話：「未有咁快，重睇緊啫。」