國際米蘭響禮拜三爆冷輸畀里昂後，教練古柏炒蝦拆蟹，鬧班球員踢嚟冇紀律、冇組織。我求大俠覺得，如果隊波真係佢講到咁無紀律，就證明佢駕馭唔到班大牌球星，佢鬧人不如先鬧自己啦。
一直以嚟都有人話古柏唔適合教班霸，佢當年教冇咩球星嘅華倫西亞就好掂檔﹔但自從佢教球星如雲嘅國米後，隊波成績係就係唔差，但總覺得應該可以再好啲、球員未去盡嘅感覺。朗拿度話離開國米，主要係頂唔順古柏，最近有傳聞話連韋利都開始唔妥佢㖭。想像吓國米冇咗韋利會點？咪好似今場冇佢就輸波囉！
成日聽人講欺山莫欺水，計我話車呢味嘢更加要小心。有人惹官非罪成都係由車而起，而富咸球員高文重慘，佢因為年幾之前炒車斷腳，幾番掙扎之後到前日終於決定宣布掛靴；佢先得三十二歲，咁早收山真可惜。好彩富咸體恤佢，畀佢加入教練團，都算有人情味嘞。
周中踢嘅英格蘭聯賽盃第二圈比賽，英超球隊贏多輸少，可能因為對手偏弱，好多二三線，或者久沉嘅球員入波同埋有好表現。熱刺成日都話想賣走烏克蘭前鋒列布夫，但連呢啲比賽都冇派佢落場，試問就算有球會想斟列布夫，都無機會睇辦啦。熱刺高層到底諗咩㗎！
拉素件荷蘭兵史譚日前爆料，話原來球會拖緊佢四個月糧，𠵱家搵律師搞解約。由佢寫完自傳俾曼聯費爵爺趕走，後來俾人屈食禁藥坐波監，到𠵱家糧都冇得出，都係講緊一年左右嘅事，我求大俠希望佢快啲行完衰運，講到底佢始終係一個好後衞。
前晚皇家馬德里爆冷失分畀雅典AEK，都算累得賭仔慘囉。最慘係皇馬方面根本唔介懷失分，教練迪保斯基賽後重話站響球迷角度，呢場波實在好精采㖭。可憐一班錯信佢哋嘅上盤客……。我求大俠奉勸大家響下輪歐冠盃時，要防範啲已經幾乎肯定出線嘅球隊，因住盲捧損手呀。