陳香梅女士，一生充滿傳奇、國際知名美籍華裔人士。佢熱愛祖國、為祖國教育事業作出無私貢獻，估唔到會幫人宣傳樓盤，原來都係關乎教育。
陳女士噚日專程來港，出席以佢命名嘅上海樓盤──香梅花園記者發布會。佢透露，基於發展商金大元對教育文化事業嘅誠意，才答應幫手宣傳。事實上，金大元喺樓盤旁建成香梅書苑，第日重會有香梅學校。
海峽兩岸有好多文化教育事業都以佢命名，但佢從來冇在兩岸投資，因為佢真正關心嘅，係教育發展，而非一己私利。
香梅花園喺上海浦東世紀公園旁，佔地十八公頃，樓面三百幾萬方呎，五十幾幢，千九個單位。金大元銷售總監師兵話，個盤上月中開始賣第一期，七百幾個單位賣咗五百幾個，呎價千一至千五。第二期明年下半年賣。
金大元喺浦東機場附近三甲港，起緊溫泉別墅，明年下半年可以賣。呢個項目佔地百多萬呎，有機會擴展到近六百萬呎。
不論土地或物業拍賣，喺內地都好普遍，但前日喺北京舉行嘅拍賣就認真特別，因為係以「無底價」方式拍賣。呢個單位喺北京國貿中心對面嘅建外SOHO一個四千三百幾呎舖位，吸引到十六個準買家參與競投，最後以超過一千三百萬賣出，呎價約三千蚊。
今次喺北京第一次搞「無底價」拍賣會嘅發展商，係北京紅石實業公司嘅潘石屹。佢大有來頭。現年三十九歲嘅潘石屹，出身於甘肅省農村，七年前創立紅石實業，並且畀內地媒體評為最有影響力十大企業家之一。潘石屹破天荒推出「顧客不滿可退房子」計劃。
市道轉旺，得益者不單止係發展商，靠一手盤搵食嘅地產代理，做到唔停手，「荷包」又重咗好多。無他，班經紀咁搏殺，都係為咗筆佣金。中原地產近排就認真拼搏，東涌海堤灣畔減價後，銷量飆升，短短兩個幾禮拜，就賣咗過百間，中原話佢哋佔逾五成交易。發展商自然以加佣作獎賞，由之前1.5%加至現時2%，成為同行中最快躋身2%高佣之列。
唔單止新發展區成績不俗，新世界嘅市區細價盤別樹華軒，個多星期賣出逾六十間。聽中原講，佢哋佔超過二十間。為慰勞佢哋，發展商即日將佣金由原先1.25%加至1.5%，又係行內首先奪得最高1.5%佣金代理。
為迎接將軍澳新盤戰，中原就大舉擴軍，將區內前線人手，由五十七人增至現時嘅一百二十八人，希望年底前加到一百五十人。
近年相當流行嘅3D電腦動畫技術，置地集團香港商用物業執行董事周明祖話，佢哋早喺85年（即係17年前），已經用呢種技術。當年中環交易廣場寫字樓預租，就係採用3D電腦動畫嚟sell客。周生呢番話，係咪暗示佢哋有重新嘅技術去介紹招租緊嘅遮打大廈呢？
另外，佢噚日喺「談古說今話當年」展覽會同記者話當年，講吓公司威水史，佢話中環怡和大廈地皮，係喺70年用2.65億投番嚟，以當年價格計係好大嘅投資。
由嘉里建設及信和集團聯手發展嘅荃灣寶雲匯，講話會今年推售，𠵱家終於有眉目，應該好快賣。發展商刻意搵咗負責嘅馬梁建築事務所董事，今日介紹個盤嘅設計同規劃詳情。
近期月租幾千蚊嘅個案大增，初期都係啲單幢舊樓先至幾千蚊有交易，估唔到𠵱家已蔓延到大屋苑。大埔翠屏花園，三百六十二呎，月租兩千二。屯門時代廣場三百六十四呎單位，三千蚊搞掂。個市咁差，唔怪得政府出口術托樓市啦！
蘭西
電郵地址：