早前一單「味之素」大王爭產案，六十八歲嘅霍紹漳喺法庭讀《基本法》猝死，揭出原來另一位最近同樣日日講住《基本法》二十三條嘅保安局局長葉劉淑儀，同霍家頗有淵源，更暴露了葉劉原來有一個影星母親。
最新一期嘅《壹週刊》，報道咗葉劉自揭從未公開嘅身世，母親藝名華彩鳳，係粵語片明星，拍過三部戲，其中一套就係同華南影帝張瑛合作嘅《牛精良大鬧香港》，後生讀者肯定未睇過。戰時華彩鳳嫁給已有元配嘅劉福成。對於自己母親是否下嫁為妾？葉劉冷冷地回應記者：「你可以咁講。」不過葉劉透露，劉家後來好少照顧佢同媽咪。霍氏後人更指葉劉嘅學費，都靠「味之素」大王接濟。不過，葉劉好爭氣，喺港大一級榮譽畢業。
《壹週刊》記者真係醒，訪問爭產案事主時，憑霍氏後人一句「爸爸同葉劉淑儀老竇合作做過生意」，就做咗呢隻古仔。個記者訪問葉劉印象最深刻，就係佢有問必答，甚至未問就答，一輪嘴講祖父輩發迹史，不過講到生母時就有啲避忌。
訪問後記都幾盞鬼，講到記者開口問葉劉攞家人舊相，葉劉先問咗句「我應唔應該幫你來醜化自己？」跟住就一口答應，重即日撲回家取相，幫記者趕在限期前交到稿，真係唔話得。八方知道噚日葉劉睇咗篇報道，無乜特別反應，睇嚟佢嘅擔心係多餘咗。
傳真︰2623-9278
電郵︰