吳文忻最近榮升「老虎阿媽」，她所飼養的兩頭長毛虎紋貓「Tiger」及「泰臣」，於農曆鬼節當日誕下了三頭小貓。
吳文忻家裏飼有兩頭長毛虎紋貓，這對貓分別叫Tiger及Tyson（泰臣），而Tiger在農曆七月十四日鬼節當日，誕下了「虎榮」、「大頭B」及「孱豬」三頭小貓。吳文忻笑指Tiger識生仔，她說：「我有搵人睇過屋企嘅風水，我擺咗兩盆鐵樹喺財位，Tiger就喺正財位生仔，佢好識搵位呀，鬼節嗰日，我瞓醒覺就見到隻貓冇喇喇生咗啲貓仔咯。」
一家五口的虎紋貓固然樂也融融，但吳文忻這位主人就頭痛了，單是捉齊五頭貓咪影全家福，她已搞了大半句鐘，其間她還要不斷俯身，在沙發和桌下捉貓。而吳文忻抱着三頭貓仔影相時，貓仔的爪竟抓着其胸口和衣領，令她痛得咿嘩鬼叫。
吳文忻自從養了一竇長毛貓後，也付出不少代價，她說：「養佢哋又唔算太麻煩，但啲貓仔重細，梗係會百厭啲，佢哋抓爛咗擺喺廳嘅HiFi，同埋屋企嘅貓毛好多，搞到我成日打乞嗤，以前對大貓跟我入房瞓，後尾頂唔順啲貓毛，我就趕咗佢哋出房瞓，點知佢哋竟然識敲門。」吳文忻稍後可能會將小貓轉送友人，她說：「我都唔捨得，亦都唔想拆散佢哋一家，但冇法啦，等三隻貓仔再大啲至畀人囉。」
採訪、攝影：朱芷瑩