謝霆鋒串謀妨礙司法公正罪成，還押監房候判，轟動整個娛樂圈，霆鋒好友紛紛發言力撐，希望法官可以酌情輕判。但鄭裕玲昨日直指法律公正，做錯事就要付出代價，又表示時下年輕偶像無知，贊成政府不再找藝人宣傳公民教育。
謝霆鋒串謀妨礙司法公正罪成，前日即時還押壁屋懲教所，待本月十六日判刑，事件轟動娛樂圈，霆鋒好友都希望他可獲法官輕判。但鄭裕玲（嘟嘟）就覺得年輕人應該藉此得以警惕，偶像並不是神。
昨日鄭裕玲、蘇永康及張學友應邀到無綫電視城，錄影沈殿霞主持的節目《掌聲的背後》。嘟嘟表示雖不認識霆鋒，但認為做錯事就該付出代價，她說：「無論係偶像定普通人，做錯事都要payhisprice（付出代價），雖然要坐監，判刑唔知幾耐，希望佢以後唔好再犯，希望其他年輕人都藉此有警戒。」
問嘟嘟若霆鋒被判入獄，刑罰會否太重？她說：「人人都係一樣，唔係單獨對佢嚟講，犯事就係犯事。」
而談到政府公民教育委員會考慮日後盡量不再找藝人宣傳公民意識一事，嘟嘟表示極之贊成，她說：「都啱嘅！成日搵藝人做啲咁嘅嘢，你問番佢哋知唔知有幾多個區？有幾多個議員？好多個都答唔出，一早就唔應該搵偶像，去個function（活動）目的係乜又唔知，上台唱完幾首歌就走，出嚟唔討好，一來不可信，二來嘥時間，嘥我哋公帑。所以有好多function搵我，如果我唔明，又唔識，我寧願推，費事失禮，如果真係做，就去認識件事。𠵱家香港多方面要檢討，尤其係偶像崇拜，乜都照單全收。」
問嘟嘟是否針對霆鋒而言，她說：「對任何人都係，偶像唔係神，好多選舉最敬仰、崇拜嘅人，香港十個有十個係藝人，好失禮。𠵱家唔係對謝霆鋒一個，做錯事要承擔，法官判決係公正嘅。」
而曾去信法庭為謝霆鋒擔任品格證人的汪明荃，昨日在電視城表示會尊重法律，她說：「希望霆鋒勇敢啲去面對，做咗嘅事要自己負責番。」問到阿姐會否往探望霆鋒時，她說：「唔會。」
至於鄭佩佩昨日出席一個公開場合時，亦表示霆鋒今次罪名成立是好事，她說：「可以作為一個教訓，畀時下嘅細路仔知做錯係有懲罰。」
採訪：楊潔雯、陳月萍 攝影：楊潔雯