銀行業難賺錢，人盡皆知，唯一方法就係老生常談，開源節流。開源各師各法，成效未知，暫且唔講；節流就係諗盡方法節省成本。銀行最大嘅營運成本就係租金、人手。減分行就可以節省唔少租金喇，何況網上銀行日漸流行，分行無乜作用啫，削減分行更可以順手削除人手㖭。
呢日在宴會上，聽到新加坡發展銀行在香港幾間銀行，如發展、道亨、廣安、海外信託四間銀行正密鑼緊鼓，預備提出私人法案，效法中銀集團重組咁樣，將四行合併，以後就四間變一間，最後名稱重未決定，睇落都係走唔甩DBS呢個品牌咯。
銀行四合一，有乜意義？對員工嚟講，心知肚明啦，DBS收購道亨之後，據業內人士講，已經減少咗七、八百人，合併之後，總員工人數唔通會增加？
日本好多銀行合併之後，新名稱冇中文名（或漢名），外間人士好難記得，譬如Mizuho、UFJ，以前係乜嘢銀行，一時間真係考起，唔知重以為係新銀行㖭。取名之道，要由專家研究，莫講話幾多畫凶、幾多畫吉，就算發音有乜諧音呢？廣東話、普通話、上海話、潮州話，統統都要搵專家測試過，舉個例，「亞洲」以潮州話讀，廣州人聽，就會似「吔蕉」，唔係幾好聽。DBS喺新加坡叫做「新加坡發展銀行」，短稱容乜易變成「新發銀行」？