假後港股，逢隔晚美股彈升，杜指漲347點，有貨在手者以為今回冇死，點知又係竹籃打水，恒指只係升得37點。早段喺恒指急升170點時買入藍籌Call輪者，一買即蟹，蟹得傷勢唔輕，去到埋單，輕易唔見15%。
趁藍籌高升，即係趁低價買入Put輪者，則有魚有肉，例如新地（016）早段見47.40元（收45.60元，跌20仙），夠膽趁低喺51仙向隻Put輪9531埋手，到收市見60仙，差唔多有2成利錢到手。不過有膽識趁低入市嘅，唔係咁多人。
中移動（941）威盡藍籌，收18.50元，有50仙進帳，本來話，中移動轉勢，吼吓啲Call輪。不過形勢仍欠明朗，中移動升後又有機會落番，要博應該調轉槍頭，趁中移動升，揀中移動Put輪埋手，第1對象係9549，第2對象係9440。
中遠太平洋（1199）冇升跌，但隻中遠Call輪9300由前市12.4仙掛低到6.5仙求賣都冇人要，按盤價散48%。
9300下月杪到期，行使價7.288元，正股做緊5.45元，上到7.288元嘅機會細過跑馬射蚊鬚，隻輪最後點收科，都唔使問亞貴咯。
章 盛