陳冠希（Edison）昨日在尖沙嘴為電影《九個女仔一隻鬼》拍煞科戲時，被一班途經的日本女遊客「包圍」，她們捉着Edison合照，狀甚陶醉，今次Edison可謂豔福無邊。
陳冠希昨日與Cookies在尖沙嘴加連威老道拍攝電影《九個女仔一隻鬼》煞科戲，劇情講Cookies帶Edison去shopping，去完內衣店又去買化妝品，之後大夥兒浩浩蕩蕩殺入利時商場。
由於是在鬧市拍戲，引來不少途人圍觀，而Edison相當受女fans歡迎。一班日本女遊客經過時，更捉着Edison影合照，又蹺手又摸面，十分肉緊，令Edison滿臉通紅。
Edison因拍《九》片而先後與其中兩位成員Theresa及Stephy傳緋聞，Cookies幾個女仔等埋位時都會走入七人車內休息，未見他與Theresa或Stephy有太多接觸。
對於這段緋聞，Edison說：「我同Stephy最多對手戲，有我就有佢，所以大家好多機會對戲，唔理電影公司做宣傳、或者報紙點寫，我同演員關係只係工作上，傾偈為部戲。」
Edison續說：「我希望教佢（Stephy）多啲嘢，我覺得佢好有potential，有機會提名做新演員，我只係希望大家好、部戲好、娛樂圈好，只要睇戲就會明白我同Stephy有好多對手戲，先會幻想到同佢傳緋聞，但咁唔代表我鍾意佢，我只當佢係朋友。」
Stephy雖力指同Edison「冇過電」，不過仍大讚對方，她說：「佢好好人，好nice，就算鍾意佢，公司都唔畀拍拖，所以會以事業為重。」
採訪：魯萍 攝影：陳偉權