近期美股波幅認真大，繼本周一重挫後，周二卻大幅反彈，杜指竟飆升346點，又上番近8000水平。股市大跌之後，自不然會有調整而大升，但幾乎每次反彈，力度之勁，幅度之大，都出乎意料，今次亦不例外。
不過，美股雖然咁勁，但亞洲市就好冷靜，大部份都高開低收，日股更倒跌過百點。港股早段最高升上9241，午後一度倒跌，結果以9109收市，上升37點。美股雖大升，但本港股民嘅信心同情緒，絲毫未有因此而好轉，入市態度好審慎，大多數都傾向減磅，埋單計數，噚日下跌股又比上升股多。期指尾市有盤扯吸，搶上9160收市，升130點，高水51點。
美股周二急彈，其實係好無厘頭。美國經濟數據繼續轉壞，美國供應管理協會9月份製造業指數跌穿50而至49.5水平，反映製造業有收縮迹象，但市場就認為呢個數字係預期嘅上限，所以對股市並無衝擊，壞消息既無反應，加上大市又確實好超賣，在低位回補推動下，加上美伊對峙氣氛紓緩，美股愈升愈急，午後杜指升過200點後，冚倉盤大舉入市，尾市再升多百幾點，應該係「人踩人」嘅結果。
不過，細心研究美股嘅特性，呢一輪都係大上大落，而且多係一衝上頂，一跌到底。就以之前嘅跌浪為例，杜指由9000開始下跌，真係一口氣咁落到7465嘅低位，跌足1500點先出現反彈；再之前嘅升市，杜指亦係一支箭咁上升成千點。所以，美股今次若果係短期轉勢，又可能會故技重施，大漲小回，升足1000點先回頭。杜指由周一低位已反彈近500點，回一回氣後，唔排除會向8400水平推進。
港股好明顯俾淡勢籠罩，噚日官股開檔，門庭冷落，僅賣出100萬個單位，唔夠1000萬元，顯然空倉大戶仍未有意思在現水平補倉。
不過，由於美股仍處於反彈期，為免吃眼前虧，短期不宜睇得太淡。港股噚日好明顯係再受制10日線（9261）嘅阻力，美股若造好，估計恒指短期有機會再衝高位，但在9400水平會有較大阻力。
郭兆誠