噚日晨早八點去釜山西面嘅「西洛東江划艇場」做採訪，心情就好似細細個去旅行一樣。有山有水、有菜田有鄉村，最緊要就係港隊有成績，小記早起床都冇問題，所謂工作不忘娛樂。
講真，小記對兩位划艇獎牌得主都幾陌生，記得吳嘉樂退役後，香港划艇隊都有一段時間沉寂，但當小記親眼睇見呢兩位新人嘅表現，就非常佩服佢哋。好似羅曉鋒兩個半鐘頭內連拼兩場硬仗，兩次都係包尾追趕對手攞獎牌；而翁嘉茵全程比賽都忍住腳傷痛，最後力拼贏第三。
呢兩位運動員嘅鬥志和永不言敗精神，真係好值得香港人學習，而小記有緣同佢哋接觸，都好似受到感染，全日充滿精力，所以之後又去桌球中心影傅家俊、區志偉頒獎相；然後再去劍擊場同劍擊隊打氣（可惜最後得第四），最後返新聞中心寫稿，工作十五個鐘都唔覺「攰」。
當然，受感染嘅既人除小記外，當然唔少得以霍震霆為首嘅領導層啦。每逢香港有獎牌，小記一定見到霍生到場，就算大風到吹亂霍生個中間分界裝嘅划艇場，霍生依然道賀兩位獎牌得主。