香港不少工業北移後，好多行業的師傅就算經驗豐富，都無法一展所長。李世粮原本憑美術方面的才能可以養妻活兒，但石膏手辦同發泡膠雕刻的工序轉移內地後，無奈要轉做地盤工人。不過，他仍相信這裏仍需要他的技術，尤其是廣告及展覽行業。
記者：李敬賢、陳漢榮
攝影：周旭文、陳漢榮
推介一
大起底
學歷：廣州美術學院二年級
工作經驗：玩具手辦師及發泡膠雕刻師逾15年
一技之長：製作石膏手辦、發泡膠雕刻
我的志願：1.發泡膠雕刻工作
2.製作石膏手辦 3.繪畫工作
要求待遇：面議
雕刻Q版公仔最拿手
如果有廣告或展覽公司需要做發泡膠雕刻，或者想搵人造石膏手辦，我係最適合的人選。我喺呢行已經有超過15年經驗，如果要我做一個董建華雕像，唔使三日就可以起貨，做Q版的，可以重快㖭。
製造玩具手辦同雕刻發泡膠係我專長，原本可以養活一家四口，但自從呢類工作轉往內地做之後，我就只好轉做地盤工人。但呢個地盤完工了，我就即時失業，都已經52歲，做地盤真係好辛苦，可以做番老本行就好了。
極速示範造模型
豬八戒＋一朵花
做石膏手辦的第一個步驟，就係用黏土做好個雛型，再用橡膠根據雛型做一個模，以石膏灌進模內，石膏乾了便作仔細修整，所以製黏土呢個步驟好重要。李世粮合共用了15分鐘，就揑了一朵花同豬八戒，動作快，作品都幾靚。
素描基本功 5分鐘畫人像
做立體的發泡膠雕刻前，一定要有好好的美術根基，平面圖當然要畫得好，於是考考李世粮的素描工夫。李世粮很隨意的取出一張女兒的相片，唔使五分鐘，女兒畫像便完成，似唔似？睇吓就知。
威水作品 博物館也有展覽
香港歷史博物館史前部份有兩個原始人雕像，原來都係李世粮的傑作，重有唔少聖誕節、農曆年街頭裝飾，好似聖誕老人、鹿車同財神爺等，都係出自佢嘅手筆。佢最滿意的，是多年前為「新加坡節展覽」製造的獅頭魚尾像。
聖誕燈飾公司老闆陳先生說：「𠵱家做聖誕新年燈飾的大型公仔，大部份都係交畀內地工廠做，再運到香港裝嵌，因為價錢會比香港做平好多。李先生或可以試下主動聯絡我們呢類公司，或者可以到時幫手修飾嘅。」
推介二
化妝師夠實際做Model有姿勢
大起底
學歷：中五畢業 工作經驗：美容師6個月、時裝售貨員1年
一技之長：化妝、擺甫士
我的志願：1.化妝師 2.硬照模特兒 3.演員
要求待遇：面議
讀過化妝做Model最Fit
我對化妝好有興趣，所以今年讀了個化妝課程，好希望有一個機會畀我一展所長，成為一個化妝師。雖然我呢方面嘅經驗唔多，但我平時都係自己化妝的，亦曾經喺美容院工作，有唔少實踐機會。我平時亦喜歡拍照，覺得自己擺甫士都OK，所以都想搵兼職模特兒拍硬照。如果做埋模特兒，我重可以幫自己化個靚妝㖭。
化妝師Sara話，想做一個專業的化妝師，除了化妝技巧外，亦需要認識皮膚護理的知識，而且要多些看雜誌，留意化妝同時裝潮流趨勢。Sara建議Kelly留意一些化妝品公司招聘廣告，佢曾修讀化妝課程，冇相關工作經驗都會考慮。
化個靚妝 10分鐘搞掂
約Kelly影相時，先請她不要化妝，因為要考佢即場化妝技巧。Kelly話之前一晚較夜瞓，所以用了淺綠色的Eye苫hadow，令雙眼看起來更精神。Kelly手勢純熟，大約10分鐘就化完個靚妝。
擺甫士 青春無敵
請Kelly拍攝充滿青春氣息的相片，唔使人教，佢都識得自己去搵道具小馬公仔，好自然地流露青春的一面。
推介三
冇經驗有幹勁做旅遊一樣掂
大起底
學歷：中五
工作經驗：半年仙跡岩水吧
我的志願：1.旅行社辦公室助理
2.水吧
3.侍應
一技之長：上網、電腦操作、略懂英語
要求待遇：面議
最想寓工作於娛樂
我重讀中五一個月，發覺自己冇興趣讀書，倒不如早點出社會做事。我的夢想是環遊世界，增廣見聞，領隊又好Sales又好，總之就想在旅行社工作，寓工作於娛樂，自知無實際經驗，但我不介意從低做起，我相信憑着自己的熱誠、幹勁，一定可以在這一行發圍，希望各位僱主畀畀面，給我一個面試機會吧！
旅遊見識 熟讀雜誌
問林啟俊有何旅遊知識或經驗，他這樣答：「老實說我只去過一次旅行，說不上經驗不經驗，但我的嗜好是閱讀旅遊雜誌，兼必看報章的旅遊版、電視的旅遊特輯。我知道萬事起頭難，但最緊要的是機會，見識見識，見完咪識囉！」
溝通能力佳 冧客最在行
問林啟俊有何能力勝任旅行社辦公室助理，他這樣答：「辦公室助理，手板眼見工夫，不難！我想最重要是溝通能力，如果有機會從低做起，讓我Sell客，我想我能勝任。」
旅行社領隊Peter仔：「旅行社與普通辦公室助理的工作性質雷同，影印、傳遞、擔擔抬抬、見乜做乜，後生仔唔怕辛苦唔怕捱一定做得掂；若想做領隊，首要條件是識執生，雖然旅行團老早安排一切，但帶團時一定會有變數，例如團友頭暈身㷫、臨時轉酒店等等，少啲應變能力都唔掂。」