近年，MAV（Multi-ActivityVehicle）市場競爭愈趨激烈，各大車廠都紛紛推出新車以示迎戰；而福特汽車亦唔例外，喺最近舉行嘅法國巴黎車展上，展出咗一款由同廠Focus車系，所演變而成嘅FocusC-MaxConcept概念車。此車不但擁有獨特造型，車上多項先進設備配搭，亦能為乘客帶來不少方便；雖然仍未有確實投產日期，不如今日就一齊嚟先睹為快，睇睇呢部FoucsC-MaxConcept有何吸引力啦！
記者：鄭達基
呢款走MAV路線嘅福特FocusC-MaxConcept概念車，造型雖帶有點同廠Focus嘅味道，但響全新鬼面罩及車頭氣霸襯托下，卻予人有另一種觀感；同時，廠方為令造型變得更富活力感，故特別為其裝上四輪18吋跑車合金軨，連235/45R18高性能輪胎組合、闊大中置尾喉，同埋喺車身上加有不少電鍍裝飾㖭！另一方面，呢部FocusC-MaxConcept概念車嘅一組頭燈，更採用上有高透光率設計嘅HID款式，從而令晚間行車變得更安全；同時，設於門邊鏡上嘅指揮燈及尾燈組合，亦採用上類似設計，務求可讓其他道路使用者，能清楚得悉你嘅去向㗎。
至於車廂方面，呢部FocusC-MaxConcept概念車，除擁有闊落車廂空間外，車內更備有四張Recaro獨立跑車皮座連六段調校功能，不但可讓乘客能感受到一個舒適愜意嘅旅程享受外，而且重可以方便運載行李㖭。然而，廠方亦為其裝有多套先進系統，當中包括有福特與HP合作開發嘅iRIS系統（integratedRemoteImagingSystem），用家可透過設於後排嘅鏡頭，拍攝到後排乘客嘅活動情況，並可透過無線網絡技術及手上嘅PDA即時得知。另外，車上更備有一套電子ParkingBrake系統，呢套系統可於車子關掉引擎後自動啟動，而當駕駛者再次將車子起動或轉換波檔時，便會自動解除；同時，車上更設有一套多媒體系統，佢除咗可用作導航系統（連GPS功能）之外，駕駛者更可即時得悉交通情況，以便找尋最快捷嘅路徑，而車上乘客亦可透過前排頭枕後方嘅兩部LCD屏幕，去觀看DVD電影㗎。雖然廠方未有公布有關此車嘅機械配搭資料，但一般相信會與現有Focus車系相近；有興趣嘅車迷，就要拭目以待喇。