月租十萬蚊左右嘅豪宅新盤選擇多籮籮，鍾意山頂嘅可以揀九倉種植道1號，單位約二千呎，有南區海景，每呎五十蚊租金。想靜嘅，可以諗諗裕泰興舂坎角曦園，三千呎屋重有私家泳池，呎租三十五蚊，貪方便嘅，有恒基中半山富滙豪庭，二千五呎大單位望維港。
咁多貨揀，但就偏偏有人鍾情新地樓，幾舊嘅都唔介意，樓齡差唔多三十年嘅深水灣道8號3號屋，三千呎有四房，租十萬蚊，乜都唔包，每呎三十三個三。
所謂一山還有一山高，新地盤咁搶手，租金都唔及淺水灣道32號，同樣三千呎嘅E屋，啱啱租咗十二萬，每呎租金成四十蚊，間屋望晒香港高爾夫球會同深水灣全海景，樓齡只係十一年，開價自然硬淨啲。
舊樓重好租過啲新盤，發展商或者大業主係咪應該諗吓計呢。
出名冇財政壓力嘅華懋，剛委託美聯，獨家租售粉嶺安定工貿中心全幢。樓高六層，93年落成，丟空至今。華懋突然高調放售及招租，每呎較年初降低四成，重罕有地免收管理費。行內話，佢地咁積極，都係想借用家趁低吸納嘅心態去貨。
美聯工商部高級營業經理李麗嫦話，物業位於粉嶺安樂村安全街3號，樓面四萬六方呎，另天台及平台五千七呎，停車場三千呎。每方呎三個八招租，月租十七萬七，賣就每呎六百。
佢又話，過去兩年，鐵路沿線可租可售嘅全幢工廈，已經消化得七七八八，預料可以吸引物流運輸、食品加工等用家。至於逾五千呎嘅地廠，就適合做陳列室。
除咗全幢工廈外，華懋火炭華耀工業中心貨尾，也委託美聯售租，樓面五萬呎，同樣有優惠，睇嚟華懋終於向現實低頭。
𠵱家發展商賣樓，除咗要價錢吸引，重要識得宣傳。華懋近年喺呢方面都落唔少工夫，今日佢哋又搞新意思，話推「包食包住」嘅震撼置業優惠，重由售樓部吳崇武頒布神秘「聖旨」，總之就係要令你注意佢哋啲盤。
今次有得「包食包住」嘅樓盤係馬鞍山迎濤灣、沙田碧濤花園同青龍頭傲庭峰。不過，蘭西唔係好明，發展商可以點樣「包住」呢？
寫字樓有幾多幢？答案係約二千五。美聯商業部原來已經將其中五百幢，用數碼相機影低入埋file，一有需要就可以call出嚟，夾埋幢大廈嘅基本資料。於是，當啲手足sell客時，會畀人好專業嘅感覺。
佢嘅對手中原都有類似做法，話喺畀客睇同埋做招標時，都可以用得着。呢兩家大行，好多方面都鬥得難分難解，連細眉細眼嘅地方都唔放過。
政府一番穩定樓市言論，引來全城各階層議論紛紛。中原主席施永青（圖三）昨日又借記者會大發偉論。佢話個樓市在政府「出口術」之前，真喺好得人驚。屯門樓深圳價、大圍金獅花園同埋港島堅道，都見五十幾六十萬元嘅成交。今番憑口講救市，雖然重未有行動，但在經濟學觀點上，就起到「理性預期」作用，效力會比政策來得更好更快。
不過，老施深明今日個樓市低迷，不禁歎一句：「幾叻嘅政府，都無辦法令樓市重上升軌」，但就希望政府今次講得出，要做得到。佢形容樓市好似患癌症病人咁，食抗生素都要食成個療程至得。今次真喺要落重藥救市，唔可以畀個市「甩頭髮」。
新地噚日宣布，委任蘇慶和做集團執行董事同中國業務首席執行官，會協助開拓內地房產業務。蘇慶和之前係房協執行總幹事，重做過地鐵物業總監，全部都係同地產有關，肯定駕輕就熟。蘭西聽同事講，地鐵主席蘇澤光，以前都曾加盟過新地，搞內地業務。兩個都係蘇生，都同地鐵有關係，重係搞內地市場，認真巧合嘞。
另外，新地又宣布委任胡家驃為集團非執行董事胡寶星嘅替代董事。新地不斷四圍羅致猛人加盟，睇嚟有大動作。
搵食艱難，各行各業都要不斷度橋吸引客戶，好似卓先咁，啱啱搞完買拍賣銀主單位請睇煙花，𠵱家又搞與代理合作嘅拍賣會。
今次係買家免佣，所以若果代理帶客參加拍賣，成功購入物業，卓先會送番兩千蚊現金畀個代理。
呢個拍賣會本月9號舉行，共有二十八項銀主貨，包括粉嶺花都廣場、元朗嘉湖山莊、大埔嘅大埔中心、荃灣海濱花園及葵涌華景山莊等，開價都係百零萬。
蘭西
電郵地址：