小初今日想講吓隻半新股至卓國際（2323），隻股上市已夠3個月，剛剛公布中期業績，盈利微跌3.3%，仍有4650萬元，而至卓就開始出現大沽盤。
小初細心睇過，發覺沽盤經紀牌粒粒都係巨星，全部來自外資大行，好似噚日咁，隻股雖然平收90仙，成交金額869萬元，但收市後重見到掛住90仙嘅沽盤，有成480萬股咁多，都咪話唔驚人。
經紀陳話，至卓從事印刷線路板生意，上市時都sell得吓，有幾個芬佬拍晒心口照起，當時每股認購價要成1.38元咁高。
至卓掛牌首日就潛水，收尾雖然曾經浮上水面，但都係一閃而過。不過估唔到芬佬坐咗3個月咁短時間就轉view，好似話印刷線路板供應過剩，價格受壓，公司前景有變，所以立即沽貨。
小初真係諗唔明，芬佬係投資專家，香港市民嘅公積金都係由芬佬管理，點解佢哋行事有如師奶。
慕容小初