噚日新聞界國慶酒會，特區領導層十分畀面，老董及三司都到齊，奏國歌嘅時候，煲呔念念有詞喺度唱國歌，非常投入。
新任中聯辦主任高祀仁雖然上任冇耐，但係已經語出驚人，既贊成告燒《基本法》者，又叫陳日君老老實實做人。不過，噚日佢老哥就學精咗好多，記者問乜嘢，佢都一味笑笑口，總之封嘴。
好彩八方一早同高主任傾咗偈，高主任話自己雖然係山東大漢，但係因為在廣東工作所以識廣東話。而港區人大代表吳康民就替佢講好說話，話姜恩柱係外交官出身，而高祀仁嚟香港之前係市委書記，所以有唔同嘅表現，重問記者係咪唔想佢再講嘢？
白鴿黨主席馬丁最心水清，話高祀仁嘅英文名字叫GaoSiren，siren可解作汽笛或警報器，唔怪得咁多嘢講；而鄭大班就唔知有心抑或無意，猛咁喺電台叫高祀仁做高「杞人」，唔通暗示佢杞人憂天？
（圖）新聞界國慶酒會，阿松（左二）呵呵大笑，中聯辦主任高祀仁（右）就玩封嘴。
傳真︰2623-9278
電郵︰