謝霆鋒串謀妨礙司法公正罪名成立，一眾圈中好友昨日聞判後紛表態支持霆鋒，其中陳冠希更直指判決「唔係咁啱」。而容祖兒則盼霆鋒經此事後，以後做事「唔好咁鹵莽」，電影界前輩張同祖亦勸霆鋒「證據確鑿，就要接受現實」。
謝霆鋒被控串謀妨礙司法公正案昨日宣判，謝霆鋒罪名成立，還押壁屋懲教所至本月十六日才判刑。娛樂圈中藝人得知此事後，紛紛表態支持霆鋒，希望霆鋒不要氣餒，其中容祖兒表示盼霆鋒經歷此事後，知道家人朋友都為他擔心，以後做事不會再如此鹵莽。而霆鋒的好友陳冠希昨得知霆鋒罪名成立後，即時垂頭喪氣，並激動地表示判決「唔係好啱」。
容祖兒昨日在西貢拍攝西門子手提電話廣告時，即場寫了兩句鼓勵霆鋒的話，她說：「我哋都因為呢件事唔開心，希望法官可以就呢件案從輕發落，希望霆鋒冇事，希望佢知我哋永遠支持佢。」記者告訴祖兒霆鋒母親拉姑聞判後即時痛哭，祖兒說：「拉姑嘅心情可以理解，希望霆鋒知道大家咁擔心佢，以後唔會再咁鹵莽啦！」
而陳冠希昨日在尖沙嘴拍攝電影，他得知霆鋒罪名成立後，即時冇晒心機地說：「真係慘！我覺得咁嘅判決唔係好啱，聽到話佢有事我好唔開心，我噚晚先見過佢，我希望聽日、後日都可以見到佢。我當然希望霆鋒唔使坐監，希望佢知道有一個朋友係永遠支持佢嘅。」
與霆鋒同屬英皇旗下的Twins，昨日出席新城電台訪問時談到霆鋒，成員蔡卓妍說：「我唔想講，如果講錯嘢會好麻煩，點都好，希望霆鋒快啲冇事。」而鍾欣桐則說：「件事搞到好複雜，不過鍾意佢嘅人仍然會鍾意佢嘅！」
至於霆鋒的舊愛盧巧音，昨日在無綫電視城錄影節目時說：「我都想知結果，但唔會太擔心，我唔會刻意打電話畀霆鋒，咁多年朋友，心照啦！」有記者要求她寫一些支持霆鋒的說話，盧巧音說：「唔使寫啦，在心中，如果佢冇事，我會送支香檳畀佢。」
吳國敬昨日則透過電話說：「聽到霆鋒暫時還押監房看管呢個消息，我好擔心，因為真係唔知佢慣唔慣裏邊嘅生活，不過，無論係點，我哋作為佢朋友嘅都會好支持佢，永遠企喺佢嗰邊。總之呢次經驗，就當係佢上咗人生一課。」
陳小春接受電話訪問時則說：「希望霆鋒冇事，能夠大步檻過。」
其他圈中人亦紛紛表態，謝寧昨日出席一個攝影展揭幕儀式時說：「好可惜，希望霆鋒可以喺呢段時間內反省，呢件事唔多唔少都會對佢嘅事業有影響，亦會對其他嘅青少年起警惕作用，都有正面嘅影響嘅。」
無綫外事部助理總監曾醒明則說：「將來我哋都會同霆鋒合作，應該畀番個機會霆鋒發展，佢犯咗事都已經得到懲罰。」
而導演張同祖亦說：「既然判咗，就要相信法律，證據確鑿，就應該接受現實，呢個世界黑白分明，好似康仔（蘇永康）同安雅咁，都去咗台灣接受勒戒。」