美股造好，但港股依然冇厘生氣，初段搶高169點後即無以為繼，好彩最後一批盈富（2800）總算有人肯買，算係一個好開始。恒指收報9109，升37點，成交61億元。
e莉莎同芬佬傾起，大家都認為美股前晚尾段只係挾淡倉，噚晚隨時回吐，港股嘅表現可當作領先指標。另一方面，日股完全冇力，再創19年新低，香港又點會有基金買盤掃貨？當然，凡事有兩面，地產股跌到現水平都算好抵買，只係等緊識貨嘅芬佬入市，據講有些芬佬手持好多現金，正等候入市訊號。
和黃（013）噚日開通歐洲3G服務，但日本仔就用「撇帳」贈興，將佢哋手持嘅英國3G股權減值80億元，芬佬利用呢個藉口，狂沽和黃，令佢逆市下跌。講真，日本仔同荷蘭佬前年用咁貴價錢入股和黃英國3G，個心自然好唔舒服，加埋核數師要撇，因此索性撇到乾乾淨淨。
噚日勁升股係上周提過嘅華南集團（159），股價升咗75%，收報0.182元，成交額只係24萬元。線人話，上周沽到隻股低至6仙係一批債權銀行，佢哋喺今次重組時攞到3000萬新股，已經全數沽晒，平均沽貨價1毫，即係幕後炒家用300萬銀接咗貨，現在貨源歸邊，想玩到幾高都得，但線人話呢批本地炒家暫時唔會郁手，今次只不過係想試吓街外重有冇貨，做完就會定住股價，各位要追炒，須有心理準備隨時「跳車」。
冷門股依利安達（033）噚日朝早十二時失驚無神出現一手1000萬股兩邊客成交，作價0.85元，引起市場哄動。同樣做線路板嘅建滔化工（148）早已對此股有興趣，但價錢唔啱，今次莫非又有得傾？
阿 虎