無綫體育節目女主持黃安琪早前去韓國採訪世界盃，佢重有機會訪問中國國家足球隊主將范志毅（范大將軍），伊人重坐范志毅嘅單車「遊車河」，由於二人態度親暱，自然好快傳出緋聞。范志毅話老婆都聽過佢哋嘅緋聞，不過就從冇過問。
雖然世界盃已告一段落，不過馮仁昭最近收到料，原來黃安琪同范志毅重有聯絡。黃安琪同朋友講話一直都有同范志毅通電話，佢重知道晒范志毅嘅行蹤。每次提起范志毅，黃安琪都一副冧樣咁。睇嚟佢哋兩個嘅緋聞唔似煲水，起碼當事人之一嘅黃安琪成日掛范志毅喺嘴邊。
港姐嘉碧儀加入無綫後工作接踵而來，所以一直有傳無綫對佢寵愛有加。近日嘉碧儀又有機會參加新劇《衝上雲霄》嘅演出，噚日見到佢喺電視城出發拍外景，重好忙咁刨緊劇本，嘉碧儀話：「我開咗幾日工，都唔算太辛苦，因為我都識中文，同埋有屋企人教我。」
現時韓劇喺港、台兩地嘅受歡迎程度不斷上升，韓國同亞洲其他地區合作嘅機會大大增加。台灣八大台老闆前日宣傳，已決定同韓國SBS電視台合作籌拍古裝劇，更選定由韓國女星宋慧喬擔任女主角，𠵱家雙方考慮由宋慧喬演出嘅故事有《少年東邪西毒》同埋《唐伯虎點秋香》。
落難歌星嘅女友，喺歌星最失意嘅時候默默支持佢，所以歌星好感激佢。原來個女仔未做歌星背後嘅女人之前，志願係想入娛樂圈做明星，嚟香港都係想睇吓有冇機會，後來同歌星發生咗感情。為咗愛情，女友就放棄咗做明星，跟住落難歌星。
黃凱芹噚日喺港台講有關前Beyond成員葉世榮女友倒斃浴缸一事，黃凱芹話同世榮同期出道，都認識對方。而今次發生事都係睇報紙先知，佢希望世榮節哀順變同應該接受事實，至於會唔會嘗試接觸佢？黃凱芹話：「都係第日有機會等佢心情好啲先再講。」
馬浚偉早排同Twins、朱茵等去中山，為「順德市慶祝國慶文藝晚會」做國慶表演嘉賓。雖然當晚落雨，不過一千個座位依然座無虛席。馬浚偉最近出外做show次次都落雨，由港台嘅太陽計劃、華裔小姐到國慶，總之佢一出嚟就會落雨，佢就自詡話貴人出門招風雨，重話已經累積經驗，演出時嘅動作會做慢啲，做足防跣工夫。
生電王姐仔除咗嗲男人叻之外，亦好擅長搵男人着數，有錢又有面嘅男人固然好，但冇錢嘅都唔緊要，只要肯做佢嘅觀音兵就得。
呢位姐仔拍親戲都會同對手傳緋聞，因為佢好鍾意黐住啲男拍檔，貪有柴可夫接送佢返屋企，有時佢又會叫啲男人幫佢買吓嘢。初頭都會有人出於男士風度幫吓佢，但久而久之，生電王就會要求人哋隨傳隨到，咁就梗係睬你都儍啦！
嚟自日本嘅AV女郎朱野順子同寶來美由紀噚日喺元朗荔枝園拍攝《聊齋誌異之孽慾鬼狐》嘅外景，兩個AV女郎喺鏡頭前三點盡露，可謂博到盡。佢哋兩個亦冇要求清場拍攝，完全唔介意在場嘅男士望到實。不過，佢哋對在場嘅女性臨記就顯得抗拒，所以又一次證明同性相拒，異性相吸啦！