國慶前夕，又有兩間公司停牌配股，其中一間係小初剛剛講過嘅香港葯業（182），真係話口未完就即刻有行動，不過配股詳細情況重未知，但根據上次經紀陳所講，公司正在斟緊配售畀一兩個芬佬。
另外一間配股係駿雷國際（070），隻股今次以每股5仙，配售2.4億股新股，集資淨額1130萬元。
經紀陳話，駿雷今次配股，似乎反映幕後講掂數。佢問小初記唔記得，早幾個月駿雷配售過一批可換股債券，之後公司股價曾經炒過一陣，跟住重大舉上京搞咗場大騷，可惜啱啱遇上仙股風暴，有人急於跳車逃生，導致股價一跌再跌。
駿雷股價咁樣插法，當然有人好唔高興，今次佢配股，當然係落在友好之中，希望可以重張旗鼓，由頭再嚟過，但隻股過往配過咁多次股，計落街貨真係相當多，再加上喺現時咁差嘅市況做嘢，能否成功，真係好難講。
慕容小初