利率低到差唔多等於零，重話有再減嘅機會，有錢佬揸住啲錢都唔知點投資，但係老牌發展商裕泰興或有關人士就唔理咁多，一於買番啲高息舖收租，繼續做收租佬。啱啱先喺屯門買咗個舖，回報率近一分四，都幾高㗎！裕泰興九叔（羅肇唐）與公子羅守耀都咁精明，連佢哋都入市，證明個盤應該幾吸引。
美聯舖位部高級經理倪金河對蘭西講，裕泰興買入嘅係康德花園地下入口、2同3樓，8864方呎，成交價只係620萬元，每呎七百蚊有找。物業𠵱家由太陽島英文幼稚園租用，月租7萬，重有4年至約滿，咁計，回報有13.5厘。
呢個舖放盤唔夠一個禮拜就成咗，但據講物業嘅契限定只可以做幼稚園，日後招租客路較窄，所以回報就高啲。
倪金河話，除咗樓上舖外，做老人院嘅物業回報率都幾高。若果唔係，就只可以等啲業主急於放售至可以買到筍嘢。好似天水圍嘉湖新北江商場地下4號舖，253方呎，就以500萬元成交，現時月租6萬，回報14.4厘。
新世界中國利用國慶黃金周假期，在廣州及順德五個樓盤搞啤酒節巡迴嘉年華，用嘅全部都係德國入口啤酒及大肉腸。佢哋請來道地德國樂隊，大奏鄉土民謠。
樂聲澎湃，令本來因為晨早北上而重係眼矇矇嘅蘭西，即刻精神一振，發現負責帶隊、擁有超級圓渾啤酒肚嘅德國大叔，一路帶領現場氣氛，一路自「隊」啤酒，寓工作於娛樂。
蘭西好奇地問新中負責人，呢個大肥佬嘅身形，一個等於Twins兩個小妹妹加埋，而Twins演唱，每首歌收幾萬銀，咁肥佬有冇呢個價？負責人笑笑口話，佢哋好貴！唔怪得佢哋可以每年只做兩個月show，然後就休息狂隊啤酒咯。
政府托市言論一出，樓市又見升溫，二手業主收窄議價幅度，個別買家更追價入市，但原來也有業主為求去貨「不加反減」。紅磡黃埔花園二期17座高層558方呎E室，減10萬元賣咗，成交價145萬，每呎2599元。睇番中原網頁，二期平均每呎造緊2626元。
中原黃埔分行經理王志忠話，原業主7月放盤，叫價175萬，之後隨市況減價。在政府托市言論前降至155萬，𠵱家再減10萬沽出。
買家喺年初睇過黃埔，之後就冇下文，近日再度出動，兩日便決定入市。
王志忠又話，啱啱做咗四期3座中層F室，923方呎。原業主8月放售價係330萬，到9月10日就降到290萬，噚日以260萬成交。不過，造價只係市價。
新鴻基地產嘅樓盤重視樓宇質素，亦強調環保，好似舊年用環保做賣點嘅元朗采葉庭，已經起好，就快可以交樓，買家好快就可以親身感受一吓環保樓有幾好。
呢個盤，蘭西印象最深刻嘅，係地庫停車場，當時發展商話，採用開放式設計，種咗好多樹，利用自然空氣對流原理，保證地庫停車場空氣清新。
蘭西
電郵地址：