港股噚日休市，慶祝國慶，但歐美股市周一狂插，搞到倫敦港股繼續跌，滙豐（005）在倫敦跌穿80元。今次香港散戶認真傷，皆因周一唔少散戶喺80元力頂滙豐，結果收80.25元。
今時今日，全球大型銀行股俱有沽壓，滙豐好難獨善其身，加上佢有唔少場外高息掛鈎票據，嗰班銀行有錢客喺80元以下則要收股票，若呢批貨掃出街，肯定好大鑊。專門睇圖買賣嘅黑客，估計滙豐今次有機會見75元。阿虎覺得佢好黑心，可惜呢排佢好旺。
心水清嘅e莉莎話，恒指喺9月份跌9%，其實計埋5、6、7、8月已經連續第5個月下跌，累計跌幅約25%。
不過港股自97年以來，最衰都未試過連續下跌超過6個月。98年金融風暴，港股由3月跌至8月，跌幅達4成多，其後因政府入市而倒升；911事件前後，恒指亦只係連跌6個月，跌幅最勁時唔見3成多。因此，e莉沙認為港股最多衰埋今個月，11月應該會好番。阿虎只能贈佢一句，凡事總有例外，盡信資料不如唔睇資料。
港股一切要睇外圍經濟大形勢，若美國總統小布殊在11月中期選舉前造勢而強攻伊拉克，大家可叠埋心水，可以唔使再睇個市。
時勢唔好，阿虎本來唔想講太多缸湖傳聞，但之前曾提及著名莊家大檸樂欲退出缸湖，最近更聽聞佢旗下數間公司放盤，其中以數字地球（109）最有可能成事，但由於數字地球一直冇掛名大股東，主席陳德雄持股量更不逾1成，所以今次易手也不須提出全購，只須傾掂數便行。
不過，佢老人家同丹哥嘅恩怨好似重未搞掂，可能難以如願淡出，始終缸湖事要在缸湖了斷。
阿虎