呢日出席飯局，有好幾位電影界老雀參加，講片場典故，都幾過癮。近來電影不景，一啲人講振興香港電影，要求政府出招打救，左丁山不表樂觀。你估電影業係地產業咩，大地產商位位都係超級富豪，講嘢零舍有力，梁錦松唔聽唔得，電影喎，只有一位九十幾歲嘅老人家係大亨，佢早已對電影冇晒興趣，幾十年唔拍片，其他人向政府高層溝通喎，排吓隊先啦。
董特首開腔，官商齊齊大合唱，首先唱起咗地產股。萬一如果假定特首要唱好電影業，呢行有冇得救呢？哈，飯局上嘅電影人多數反對政府干預，認為政府扶助只會幫倒忙，睇吓台灣經驗就知嘞，因為攞政府錢去拍片，一定是藝術主導，與市場脫節，變成叫好不叫座，電影業就變成長貧難顧！
左丁山矇查查話：「去年《少林足球》咁收得，點解唔拍多一兩部，刺激市道呢？」一位電影人答：「唉，河南少林寺已在內地註冊少林寺版權，凡係講到少林寺、少林和尚、少林武僧等故事，都要申請版權，所以《少林足球》唔可以在內地放映。現在少林寺方丈係一個年輕和尚，大約三十七歲，聽講擁有MBA學位，好識得品牌生財之道㗎。」嘩，時代真係進步得快，睇武俠小說，少林方丈個個係七八十歲老和尚，武功深不可測，點知真實世界中，方丈竟然讀埋MBA，豈非文武雙全？唔怪得周星馳遇到對手咯。