幫英超聯球會踢波有幾辛苦？富咸中場日本國腳稻本潤一最近就爆料，話佢雙腳已經開始有「發軟蹄」迹象，搞到近期表現走晒樣。
上個月先至當選亞洲足協八月份最佳球員嘅稻本，最近表現已經冇季初時咁搶鏡，重連續四場踢唔足全場！點解？稻本向「自己友」訴苦，話上季喺阿仙奴坐喺後備席時間太長，加上今季泰簡拿要佢多啲幫手進攻，結果打咗十二場波腿部肌肉就經已有痠軟情況。其實話晒亞洲人體格同歐洲佬有分別，同時間要應付英超聯同歐洲賽唔易，況且富咸又唔肯提早同佢簽長約，心情始終影響喺球場嘅表現。稻本，不如染番個「金毛頭」沖喜吓啦！
費倫天拿雖然被迫降咗落意丙聯，但佢哋賣出嘅季票，竟然多過帕爾馬、拖連奴、基爾禾同烏甸尼斯等多支意甲聯球隊。到周一為止，費倫經已賣咗一萬六千六百四十八張季票，唔單止破咗意丙聯嘅季票紀錄，重比上季賣多咗成五千張。咁樣睇嚟，帕爾馬同拖連奴等意甲聯球隊，真係要好好反省一吓，諗計吸引多啲球迷入場。
伯明翰後衞佩斯喺上場對紐卡素因掟走個波而被罰黃牌，搞到成為今屆超聯首個因累積五黃而停賽嘅球員，兼且重要畀會方罰兩個禮拜人工（三萬鎊）。事關伯明翰領隊布魯士為咗令啲球員唔好被罰停賽，季前講明球員如果因做出一些愚蠢行為而招致被罰黃牌，就要罰錢。佩斯𠵱家白白唔見咗三萬鎊，真係咎由自取。
迪比亞路同埋恩沙基可謂意甲當旺雙星，早幾日恩沙基咪話想染指歐洲足球先生嘅，當記者問迪比亞路又點睇自己機會時，佢答：「我比較實際，呢個獎係屬於響國際賽有好表現嘅人，例如朗拿度、魯爾同埋施丹。」迪比亞路咁講，似乎暗寸恩沙基唔實際同唔自量喎。
亞洲足協秘書長韋立本喺釜山話近年亞洲不停直播歐洲各大足球聯賽，會阻礙亞洲足運發展，所以準備要國際足協出面干預。據我求大俠所知，國際足協的確有例保障各洲聯賽，各地足總的確有權唔畀直播部份賽事；不過，呢啲事件通常可用錢解決，只要歐洲各大聯賽肯將轉播費幾個百分比攞出嚟幫助亞洲發展足運，就肯定大家都開心啦。