噚日係國慶大日子，香港有好多酒會都見到李嘉誠。但八方聽聞誠哥今日其實要趕去英國親自督師，主持佢哋集團歐洲第三代流動電話（3G）開通活動。八方上周四偶遇誠哥時，佢老人家已講明今周實喺英國，因為和黃投資接近二千億元發展歐洲多個國家的3G牌照及建立網絡，並將3G品牌訂為「3」，話晒係和黃最大型嘅投資，誠哥當然唔想有任何閃失。
英國報章噚日話，和黃今日會從設備供應商手上接收一千部3G手機，分配畀英國及意大利的一千名客戶，測試新網絡的質素。八方肯定誠哥係呢一千個客戶之一，重會係最先試打㖭。
聽講和黃原先想搞個大型活動，希望嗰啲看淡和黃3G業務前景嘅分析員及基金經理親自嘗試呢項新服務，但其後只係低調地搞一個友好聚會。所有和黃高層現已身在英國出席這場面，誠哥又點會錯過呢？
（圖）誠哥（左）噚日去完國慶酒會，今日就趕住飛去英國。
傳真︰2623-9278
電郵︰