自從中聯辦搬咗去西環，跑馬地嘅大廈舊址用途好受關注，事關嗰度有馬場靚景，雖然𠵱家地產市道低迷，但係一樣有價有市。噚日中聯辦主任高祀仁話，跑馬地中聯辦大廈將改建酒店，𠵱家準備放盤，暫時已經有成四、五間公司表示有興趣。
其實，熟悉中聯辦嘅人都知，呢座大廈前身就係酒店，八十年代前新華社香港分社因為業務擴大，趕住搵地方搬屋，於是新世界老闆鄭裕彤即將啱啱起好嘅酒店，讓咗畀新華社，當時負責所有租賃合約嘅人就係已故嘅「珠姐」廖瑤珠。
八方聽講，因為本來係酒店，所以以前個個社長部長嘅辦公室都係套房，有埋私人浴室。雖然跑馬地新記大樓已經好陳舊，個樣又老土，但見證咗香港大時代嘅歷史，拆咗佢真係可惜，如果改做博物館，其實都唔錯！
傳真︰2623-9278
電郵︰