法國雷諾車廠響今屆巴黎車展會場上，展出咗多款新車，當中包括有全新MeganeⅡ及一系列新車外，當中一部新版ClioV6跑車，更成為全場焦點所在。
驟眼望去，新版ClioV6造型與現有型號相近；但當細心留意吓，就會察覺到新車鬼面罩換上FamilyLook款式、頭泵把及氣霸等等改用全新組合，配合四輪18吋跑車合金軨配搭，一派高性能跑車形象徹底地展示出來。車廂布局方面，除一雙桶形跑車座椅之餘，另外重有全新跑車軚環、鋁合金波棍的及腳踏等等，從而予人有耳目一新之感。
而一台3.0公升V6偈，馬力輸出增至255ps/7150rpm，扭力亦達30.6kgm/4650rpm，配合一套經改良嘅6前速CloseRatio手動波箱，性能表現明顯來得更強更勁。同時，經強化嘅底盤結構加上18吋高性能輪胎組合，亦可增強路面循迹性㖭。新車將於年底喺歐洲市場推出，未知香港代理會否將之引入呢？