一味窩輪:新地輪搏殺揀9531

一味窩輪:新地輪搏殺揀9531

國慶日港股冇市,隔晚歐洲股市跌到七個一皮,美股亦唔似樣。港股今日復市,又係捱打格局,想搵食,又係要向Put輪埋手。不過有啲藍籌已經好低殘,買佢哋嘅Put輪,要相當勇氣。
新地(016)前日收45.80元,雖然單日已跌2.10元,但同上禮拜二最低42.80元比較,仍然高出3元,諗吓相關Put輪,估計仍有水位。搏殺型,揀9531,隻輪明年3月到期,現價58仙,溢價12.2%,槓桿率7.9倍。冇咁搏殺嘅,有9432,明年2月夠鐘,現價1.33元,溢價4.6%,槓桿率3.4倍。呢兩件新地Put輪,係同類輪中交投叫做最多嘅。
滙豐(005)氣勢冇晒,中銀(2388)都唔慌叻得去邊,不過跌幅唔會太大,只係陰陰吓落。

9457屬高危輪
有隻中銀Call輪9457,屬於高危貨色,乃因近排雖然跟正股下跌,但跌得唔夠,以致啲數據唔多啱數。9457明年8月夠鐘,現價1.95元,溢價高到29.9%,槓桿率只有4倍。睇吓另外1隻9462,明年7月到期,壽命只係短1個月,但溢價6.2%同槓桿率7.8倍,着數幾多?中銀就算唔跌,9457嘅溢價都會係咁縮,縮到你怕,輸到你驚。
章盛