柯受良（小黑）繼九七年飛越黃河後，昨日又在西藏布達拉宮前的廣場表演飛車，現場吸引四萬人圍觀，由於人潮太多，小黑的戰車被迫在地上而不是紙皮箱上着陸，結果傷及腰和肩。
柯受良繼飛越黃河後，最近又到西藏，在布達拉宮廣場前表演飛車。昨日小黑全副武裝登上戰車，在三百米的跑道上以時速一百公里飛越四十米的高台，場面緊張。
今次飛車表演一共花費近一百萬元，而昨日在廣場前亦吸引了不少內地傳媒和近四萬名市民圍觀，部份觀眾站在飛車着陸點的紙皮箱附近，令小黑要減慢速度，結果他的戰車不夠衝力飛抵終點，被迫煞車落地，小黑的膊頭和腰部受了輕傷。
小黑事後說：「可以表演畀佛祖同全中國人睇，我好高興，跟住我會即刻參加一連五日嘅越野車賽，對我來講都係一種挑戰，今次喺西藏進行飛車表演，我真係諗唔到有咁多人嚟睇，佢哋又唔知危險，重要企喺紙皮箱附近，我表演前已經用大聲公勸佢哋離開，但根本冇作用，搞到我飛車時唔敢開咁快，結果唔夠衝力撞落紙皮箱度，變咗撞落地下。」
小黑續道：「雖然有少少瑕疵，但我認為今次表演總算係成功嘅，有咁多人嚟見證，其他人又冇受傷，而我只不過係小傷。」
小黑於九七年六月曾在黃河流水最急的位置壺口，成功飛車躍過距離四十二米闊的對岸，而昨日他在西藏布達拉宮前的廣場飛車，高台底下則放置了七、八部私家車，藉以增加飛車時的危險性。今次小黑在飛車時有驚無險，飛越之旅總算告一段落。