自從黃家駒過身後，Beyond剩番嘅三位成員黃貫中（阿Paul）、黃家強同葉世榮，夾band夾咗一陣就解散作個人發展。最近馮仁昭聽講環球有心想重組Beyond，繼簽咗阿Paul同家強後，佢哋早輪積極同世榮傾合約，不過雙方面一傾到價錢就傾唔埋欄。
𠵱家唱片咁難做，好多唱片公司都縮皮，馮仁昭收到風，話其實當初家強簽環球時，已經俾人大壓價，到環球斟世榮，世榮不甘價錢被壓得太低，卒之決定唔簽約，咁即係話Beyond重組唔成喇！
噚日馮仁昭特登打去畀環球唱片總經理KevinWong，佢照例否認傳聞，重話環球冇壓人價，佢哋同世榮冇乜傾過合作，Kevin好玄咁話：「環球係有諗過重組Beyond，但唔一定要簽晒三個artist，就算我哋簽晒三個，亦唔一定要重組。𠵱家家強專注做佢隻個人大碟，要重組都遲啲先傾啦。」
雖然噚日係國慶假期，但係陳芷菁仍然要返亞視主持節目《群星情報站》，不過芷菁就話放工約咗男友同二十幾個朋友，租架遊艇出海睇煙花慶祝國慶。
芷菁重提到早前採訪組合F4被拒於門外一事，佢話百事嘅美國總公司後來都有寫信畀亞視解釋，不過採訪當日F4其實都有同亞視拍咗個短片！
香港電影市道差，今年冇乜見得人嘅港產片，重連累到好重視本地電影嘅東京國際電影節。呢個電影節今屆只係得黎明主演嘅《三更》參展，而《麥兜故事》就做咗開幕影片。喺欠缺港產片參展嘅情況下，居然連邵氏陳年舊作《大醉俠》都要攞埋出嚟招呼班日本影癡，認真陰功！
蘇永康早前因搖頭丸事件喺台灣接受勒戒，台灣新聞局決定暫時唔發工作證畀康仔，禁止佢喺台灣從事商業活動。康仔噚日下晝去咗台北，應台中地區一間學校嘅邀請，出席反毒活動。
因為未有台灣工作證關係，康仔噚日啱啱到台北，一見記者即事先強調今次到台灣純為公益活動，絕對唔係做任何商業活動，佢又話十分樂意為反毒工作出力，絕對唔會趁機賺錢。
有個喺寶島嚟香港發展嘅男歌手，呢年好低調，唱片都冇得出，聽聞因佢得罪咗某高層。話說有次唱片公司高層叫咗某女歌手到卡拉OK，其中一位高層講明要女歌手當晚陪佢上床，點知個女歌手唔肯，後來佢即刻打畀呢個男歌手。男歌手寧願同高層反面都要帶女歌手走，結果佢哋成功走甩，但以後要出碟就難啲啦！不過男歌手冇後悔咁做。
黃凱芹早前為新碟影封套，佢一早準備咗幾套靚衫，影完一套又一套，當佢入房換衫時，竟然有個女工作人員盲中中走咗入房，當時已經除咗條褲嘅黃凱芹嚇到即刻擰轉身兼用手遮住重要部位。點知個女工作人員表現得見怪不怪，搞到黃凱芹更加唔好意思，佢重話：「乜𠵱家啲女仔咁開放㗎。」
靚仔男星呢輪因為女友又搭上其他男人，終於又忍唔住要同女友一刀兩斷，所以呢輪成日蒲夜店搵女伴。雖然佢講過話要戒酒，但馮仁昭個老友喺上個禮拜，去跑馬地一間酒吧玩，見到佢同幾個男女朋友喺度飲酒，睇佢個樣就唔似好開心，似借酒澆愁多啲。
睇嚟靚仔男星同女友分手，對佢打擊都幾大，如果唔係佢唔會咁失控，飲到咁醉，連行都行唔到，走嗰陣重要幾個朋友扶住佢。