選管會主席胡國興法官自從做完特首選舉之後，修心養性做番法官，但係好快又會出番嚟同大家見面嘞。噚日佢就主持咗個區議會補選的簡介會，不過小小一個補選算得係乜吖，好戲在後頭，民政事務局唔知做乜咁好帶挈，交咗村代表選舉畀胡官睇！
八方重記得胡官以前講過，唔希望搞村選，因為大大話話要選一千四百個村長，要確保每個公開公平公正真係唔易。不過𠵱家煮到嚟就要食，胡官話佢只係負責做指引，其他由各區民政事務署搞，咁佢會唔會落村監選呢？胡官真係答得直接：「點睇呀？七百條村點睇呀？」
呢頭唔知點睇，嗰頭選管會又要搞埋明年區議會選舉；林瑞麟失驚無神話加十個議席，搞到區議會選區要重新劃過，林局長講一句梗係話咁易啦！八方就替胡官辛苦嘞！
傳真︰2623-9278
電郵︰