唔到你唔服，同樣是4,096色彩芒嘅手機，家陣千六、七蚊都已經有部，剛剛殺到的行貨Nokia7210，派街的標準水位叫價亦要$4,180，顯然對新機信心十足。究竟7210憑乜值得用家們追捧？MMS、和弦鈴聲、收音機功能、換殼，抑或是嶄新的V形Keypad設計？不過，最有可能的只因為新機是「諾記出品」！
記者、攝影：招佩珊
Nokia7210Profile
制式：GSM900/1800/1900三頻
尺寸：106×45×17.5mm
重量：83克
通話時間：2-5小時
備用時間：150-300小時
功能：WAP1.2.1、GPRS、JAVA、MMS、4和弦鈴聲、FM立體聲收音機、免提揚聲器
售賣點：通訊無限
地址：旺角先達廣場地下G62號舖
電話：23936789
7210睇落似是8250的拉長版，其實外觀是耳目一新的設計，將視線轉移到鍵盤上，便會發現到7210與同門手機最大的分別，是將Keypad最外左右兩排的數字鍵作出流線型排位，並與機面外框線條連成一線變成V形設計，打破以往外形沒有太大變化的所謂新機。7210亦秉承家族傳統，底面殼均可拆出更換。
和弦鈴聲有幾Hit？無論大細品牌、直機摺機，只要是近期上市的新機都必定加入和弦鈴聲，至於7210亦有4和弦鈴聲，雖則不及16或40和弦的靚絕鈴聲，但總算唔會Out。新機備有FM收音機功能，插上跟機附送的立體聲耳筒，收聽電台節目之餘亦可作免提通話。不過，今回7210用上全新的長方形接駁埠，一改以往見慣的2.5mm插頭，舊有的耳筒就用唔到，往後推出的新機亦會改用7210呢款接駁埠。
翻開功能表，有可按個人喜好增加或刪除遊戲及應用程式的Java技術、收發圖文並茂兼有聲的多媒體訊息（MMS）、傳輸速度可高達40.2kbps的GPRS，用彩芒玩得更過癮的遊戲就當然唔少得。另外，7210屬於Nokia第一部於香港正式開賣的三頻機，適用於本地雙頻網絡外，亦可漫遊美加等地區，相信Fans們特別高興，皆因買三頻機終於可以揀番諾記機，數落7210確實功能齊備。