瑞典富豪車廠近年推出多款新車及概念車，當中不乏有高性能型號，而喺今屆法國巴黎車展作首展嘅V70R旅行車，正好係最佳例證；跑車化造型除予人有一份懾人魅力外，一台馬力輸出高達300匹嘅引擎組合，更教人為之怦然心動。睇嚟當新車於明年推出時，定會惹來不少車迷垂青㗎。
廠方為突出V70R嘅高性能跑車形象，除為其改換上銀色鬼面罩外，車頭擾流器亦經過改良，以改善高速行車時嘅氣流擾動情況，就連生風入口面積亦被加大，務求可增加吸風量，幫助改善引擎嘅散熱問題。另外，用家更可選擇為車子裝上17或18吋跑車合金胎軨組合，從而令造型變得更煞食。
相信最吸引嘅，會係V70R一台2521cc直5Turbo引擎，馬力輸出高達300ps/5250rpm（自動波版為300ps/6000rpm），扭力則為40.8kgm/1950-5250rpm（自動波版為35.7kgm/1800-6000rpm），匹配一套全新6前速手波或5前速Geartronic自動波箱，無論起步加速都可有出色表現。駕駛者更可選擇以Comfort、Sport或AdvancedSport模式駕駛，以切合不同路面需要㗎。
全新V70R嘅車廂配搭，亦與外形來得富有一份濃厚跑車色彩，座椅除以高級真皮鑲嵌而成，當中一雙前排更屬桶形設計，加上闊落車廂空間，乘坐倍覺貼服舒適；然而，三幅式跑車軚環把持感十足兼極富路面感，而表板組合重以藍色作底色，配合埋刻有R字樣嘅門邊腳踏，一派高性能跑車形象更見突出㗎。
現時仍在熱賣中嘅新款平治S-Class，自於1998年推出以來，一直備受用家追捧，但廠方為迎合不同用家需要，故特別為其推出2003年Facelifted新版，並加裝多套先進系統，以增強行車安全性。
先從外形方面說起，新S-Class嘅車頭泵把及氣霸，都經過重新修飾，從而令車子望落去較前闊了一點，而鬼面罩及一組頭燈等等亦略作修改，以增強新車嘅吸引度。廠方亦為新車車廂作出超過40項修改，務求為乘客帶來一個更舒適，以及更豪華嘅乘車環境。另外，其中一台V6引擎嘅容積增加至3.7公升，馬力輸出較前增加約12.5%（達245匹），扭力亦增加咗約13%（達35.7kgm/3000rpm）；而配備呢台新引擎嘅S-Class，更被定名為S350，據聞重會用以取代現有S320型號㖭。同時，用家亦可為新車配用全新4MATIC四驅系統，以增強行車穩定性外，另外更可配有全新PRE-SAFE安全系統，以便在意外發生前對乘客作出多項保護措施，務求可減低乘客於意外受傷嘅機會。