馬年重有成幾個月，市面已經有不少羊年運程書，八方抱住「八卦」心態，睇吓出年流年乜嘢環境，順便睇埋屬牛嘅董特首，因為佢流年好唔好同七百萬人飯碗好有關。
八方一睇屬牛者運程，嚇到眼到凸。今年老董已經犯太歲，明年佢「冧莊」，繼續沖犯太歲，最大鑊係話冇吉星化解。本書話屬牛者要勇於面對現實，先可轉危為安，唔知係咪暗示老董唔好成日話香港冇問題、問責制冇問題、馬時亨更加冇問題，當乜都睇唔到呢？
工作上肖牛的人今年容易與人爭拗，宜息事寧人，而且易犯官非。唔通佢班問責官同老董唔妥？定係老董會同民主派開火？至於官非喇喎，睇怕明年除咗居港權會繼續打官司外，《基本法》二十三條過埋，大把官司嚟緊。
財運又點呢？更加冇眼睇，正財橫財都話唔好強求，唉，怕且明年財赤都係有多冇少。至於賭波規範化呢，都話明冇橫財，搞嚟做乜鬼！
講到健康，生肖書話要慎防積勞成疾，呢句唔使解，咁阿董係咪成年冇好嘢？咁又唔係，本書話屬牛明年「易與異性投緣」，但要「小心縱慾，惹上孽緣」！嘩！老董，小心董太「扭耳仔」呀！
傳真︰2623-9278
電郵︰