葉劉淑儀嘅民望好高，《信報》余錦賢話「葉劉淑儀不是馬時亨」，你睇幾咁誇獎佢，事實上，呢位局長做事醒目、勤力、肯讀書、好記性，識得唔喺小事上糾纏（例如聽從文化界人士之言，將「身分證」改番做「身份證」，令文化界條氣好順），在在都證明佢嘅手腕好高，勝過部份局長幾皮，直頭係下一任政務司司長熱門人選。
不過俗語有話，勝利衝昏了頭腦，葉劉淑儀喺立法會（九月二十六日）上嘅對答，話明「的士司機、酒樓侍應、麥當勞嘅服務員」唔會同佢逐條辯論基本法，此言差矣，難怪《蘋果日報》蘋論話佢arrogant，好彩佢好命，唔使參加直選，否則有排煩。德國司法部長（女性），因為講咗一句「布殊現在嘅方法，希特拉以前用過」，即刻俾人鬧，在大選中落敗，全靠德國嘅選舉比例代表制用社會民主黨嘅名額，先至可以做番國會議員，但施羅德已經唔敢再搵佢加入內閣。
若果香港嘅政治制度同德國、英國一樣（部長必須係議員），葉劉咁樣得罪小市民（佢口中之司機、侍應、服務員係舉例啫，算係小市民嘅代表），喺議會鞠躬道歉都唔掂。喂，老毛都話要相信群眾智慧，走入群眾，葉劉點可以當正自己係elite，智慧高人一等，睇低啲proletariat階層？醒目如葉劉淑儀都咁樣睇低小市民，可見政務官的elitist（精英）心態仍然未甩，冇隨住英國人而去。