國慶前夕，港股散落去，冇乜人有意外，恒指跌222點，收9072，期指跌190點，收9030，最低9006，幾乎守唔住9000點。
滙豐（005）收80.25元，跌2.25元，跌幅同大市同步，最低80元。滙豐啲Put輪，槓桿率好高，自然因為正股散而有出色升幅，10大升幅輪中，有6件係呢類窩輪。滙豐暫時守住8字，不過同去年911後最低68.25元比較，仍然高出好多，而恒指又想下試當時低位，滙豐8字頭守唔住嘅機會存在，滙豐Put輪仍然係做世界對象，9123啱喜歡刺激嘅炒家埋手。
跌市中，中移動（941）相對硬淨，收18元，雖跌15仙，但較最低價17.55元，已經回升45仙。最低價同上禮拜兩次最低價相同，算係暫時考驗底部成功。過多幾日若守住18元，可以諗吓相關Call輪，對象係9532，明年3月到期，現價11.1仙，溢價18.9%，槓桿率16.2倍。其次9526，交投同9532一樣咁旺，贏錢輸錢要計數都好快。
海爾中建（1169）昨日急升13.1%，公司輪873收3.2仙，升45%，04年2月到期，溢價300%，槓桿率4.3倍。隻輪行使價52仙，最後都會冇得剩，買賣都冇乜意義。
章 盛