無綫嘅節目收視經歷咗中秋節嗰個禮拜慘跌之後，上星期已經普遍回升，其中升幅最好嘅應該係由曾志偉、林曉峰同錢嘉樂主持嘅遊戲節目《吾係獎門人》，平均收視有二十六點，升咗十二點，即係有一百七十一萬觀眾，但係相比起之前《獎門人》嘅收視，其實二十六點真係濕濕碎咋！而《流金歲月》升番五點，平均有二十九點，約一百九十一萬觀眾收睇。
中秋節嗰晚嘅《吾係獎門人》平均收視慘到得番十四點，只得九十二萬人收睇，最主要嘅原因就梗係卡士唔夠勁啦，組合EO2、E-kids、SiSi同埋一班落選港姐，真係唔係咁多人識，再加上當晚出席嘅《皆大歡喜》演員，有部份喺冇幾耐之前已經上過呢個節目，啲觀眾又點會有新鮮感呀！
上星期嘅《吾係獎門人》嘅嘉賓有伍詠薇、趙學而同黃佩霞等，雖然升番十二點收視，但都重未係好理想，其實無綫有咁多阿哥、阿姐，加上主持人曾志偉又有咁多好朋友支持，照計啲收視應該唔使好似坐過山車咁大上大落，要食驚風散定驚嘞！
向海嵐最近同時拍緊兩部劇集，前日佢第一日開拍新劇《花樣中年》，佢雖然從未試過吸煙，但為咗喺劇中扮一個煙不離手嘅大明星，所以要不停吸煙。但向海嵐一吸完支煙，已經想嘔，夜晚返到屋企重發燒，所以佢話拍吸煙戲真係有難度。向海嵐早前話過呢個角色似鄭秀文，點解佢唔去請教吓Sammi吸煙嘅秘技呢？
早排鍾鎮濤（阿B）因為欠下裕泰興財務巨債，早前向法院申請個人破產，但阿Ｂ因而俾鷹星保險睇中，邀請佢唱廣告歌《星光不變》，以配合公司「人生多變、專業不變」嘅精神。
阿B表示好開心可以唱呢首歌，佢話雖然𠵱家香港處於艱難嘅時刻，希望大家都可以勇敢面對挑戰。
作曲：羅尚正
填詞：馮偉賢?姚冠東
主唱：鍾鎮濤
無論順逆 亦努力 無限拼勁 決意再打拼 只想可以 每天演好我 自己的角色
唯有實力 是價值 唯用智慧 令我勇敢去 衝開一切 飛上天際 摘理想的那顆星
從不 計較付出的多與少 總會 有你與星光照耀 人生 無論起跌浮沉 鬥志是不可缺少 從未靠運氣 願意再伴你 開創新天與地 堅信自我 不信奇蹟 每天跟灰心角力 無懼風雨 無懼怕挑戰 翔翱似鷹不怕天色 不變是我 不靠奇蹟 一生一心的努力 面對一切 長路也不計（流汗亦可貴） 自信以星光 同創盛世 （明日滿星光 長照萬世）
杜麗莎噚日四十六歲生日，佢最近獲纖體公司贊助減肥。杜麗莎噚日去銅鑼灣出席記招，佢話𠵱家有一百四十磅，希望可以喺十個星期內減二十五至三十磅。杜麗莎老公亦相當支持佢減肥，佢話：「老公話好開心，佢等我減咗肥，變身『新老婆』形象返去見佢。」
名媛早排同富商個仔拍拖，冇幾耐就分手，大家都以為名媛𠵱家感情空白，其實佢同一個女性朋友行得好埋，上流社會好多人都知。
原來名媛不嬲都對同性有興趣，身邊嘅男伴不停換，女伴其實換得重多，大家都係女人，就算出街親熱啲，都唔會俾人懷疑吖嘛！
周杰倫（阿Jay）上周六喺台北舉行個唱，有人話阿Jay唱歌太細聲，又有兩個把聲同佢好似嘅和音伴唱，更有人質疑阿Jay咪嘴。後來阿Jay經理人公司澄清，因個唱前一日，有一條傳輸演唱會聲音嘅主要線路被壓壞，所以出現和音比主音大聲的情況，而阿Jay亦已盡力大聲獻唱，到尾段重索性清唱，唔要音樂襯底，以致演出完畢後，佢把聲已經沙晒。
錢小豪噚日去沙田仁安醫院接老婆同BB出院，佢老婆足足住咗六日五夜，淨係住院費都三萬幾蚊。
BB重未改中文名，不過BB個阿爺已經預備咗成七至八個名畀小豪揀，英文名就等錢小豪個大仔幫細佬改。好友陳法蓉就送咗一個月嘅尿片畀BB，張兆輝就送咗張BB床。
年過三十嘅「少女好」好鍾意出去蒲，好似早排佢拍緊劇嗰陣，有人不時見到佢收咗工就去中環蒲吧。「少女好」通常都係同幾位女性朋友喺度飲酒傾偈，本來冇乜問題，弊就弊在佢次次飲到醉晒至捨得走！結果第二日開工，「少女好」成個人就口腫面腫，一睇就知佢酒氣未過。
其實啲朋友都有勸過「少女好」戒酒，但佢始終唔肯聽，如果佢再係咁，飲到走晒樣，怕且做多兩年都可以執包袱。
台劇《流星花園》女主角徐熙媛（大S）靜靜雞嚟咗香港，前日馮仁昭喺尖沙嘴見到大S，佢好輕鬆咁四圍逛，但係佢助手就攞住幾個大袋，睇嚟大S買咗好多嘢。
雖然大S化咗妝，重着咗件紫色Ｔ恤同黃色紗裙，但就冇乜市民認得佢。馮仁昭問大S係咪嚟做嘢，不過佢助手就搶住答話只係過境喎。其實佢應該係前兩日出席完廣州一個頒獎禮，順便嚟香港啫。