官府一聲托市，居屋存廢問題，又再引起激辯。居屋與民爭利、打擊樓市，已經講咗好多，噚日有啲見解，都幾新鮮。
長江實業主席李嘉誠上周提到，居屋嘅歷史任務已經完結。佢嘅下屬執行董事趙國雄，以前都只係話，應該將起居屋嘅資源，用喺更有需要嘅地方。噚日趙生進一步話，起居屋先至係干預樓市，若果唔起，只不過係減少干預。究竟佢咁講有冇玄機，大家好認真啲諗吓啦！
同時，香港大學亞太經濟合作研究中心副主任邵啟發話，樓市暢旺，係反映市民對經濟前景嘅睇法，但外界以為，搞旺個樓市經濟就掂，根本係本末倒置嘅想法。樓市長遠走勢，一定係要靠經濟帶動。
邵啟發認為，政府干預市場幾時都係唔好，減少扭曲市場先啱。近日居屋賣得差就係證明啦。佢建議政府，應該唔再起居屋，同埋將啲居屋貨尾交由物業管理公司決定出租定係出售。
今日國慶，又有煙花睇！但係發展商唔止要繼續促銷樓盤，而且工作時間比平時長，因為要搞埋欣賞煙花晚會，不過，大可以寓工作於娛樂。
長實紅磡超高豪宅海名軒，今晚安排各業主，喺7樓會所齊齊睇煙花。個盤臨海而建，前無遮擋，自然係最理想地點之一。長實又可以藉機凸顯樓盤嘅優點，一舉兩得。同系尖沙嘴港景峯，就招待傳媒睇煙花，等大家感受吓樓盤270度超廣角無遮擋維港景觀。
至於恒基啱啱起好嘅尖沙嘴棉登徑豪峰軒，景觀超越前方建築物，無遮無阻，所以都請傳媒睇煙花，佢哋重講明不涉公事。
另外，剛過去嘅禮拜日，卓先搞銀主拍賣會，推出三十一項物業，售出七項。投到嘅買家可以免費喺九龍香格里拉睇煙花。
中原地產上月初喺二十五周年活動揭幕禮上公布，為健康快車舉辦慈善麻雀賽，預計開一百枱，每枱最少可以籌得二千蚊。據講反應良好，已經籌到二十一萬。麻雀慈善賽喺周三晚舉行。
中記為咗鼓勵同事參賽，設咗個團體獎，表揚籌款最多嘅區域，暫時以東九龍黃寶英，同商業部鄭繼標所屬組別籌得款項最多，爭緊冠軍。
蘭西收到一份投訴傳真，一家新加坡公司講述在中國內地投資房地產嘅遭遇，值得講出嚟，讓大家有所警惕。話說呢家新加坡公司，99年買咗間上海舊洋房，使用期四十年，上住下商，於是就將物業全面翻新，開檔做生意。
月前另一家房地產公司通知佢，話要進行「舊住房成套改造」，所以要拆咗佢幢樓。賠償金額只係市值嘅四分之一。星洲公司向多個部門投訴，但都係冇用。佢哋覺得上海法制唔健全，喺當地投資風險好大。
星洲公司向區法院提出起訴，但對初審結果都唔係好樂觀。假如各位有興趣喺上海投資房地產或者置業，切記留意事態發展。
德國正舉行啤酒節，廣州今日都有相同嘅慶祝活動，由發展商新世界中國舉辦。
今日起至12月初，新世界中國會喺廣東省舉行「新世界中國巡迴嘉華年──德國啤酒節」，重點宣傳該集團廣東省六個豪宅盤。
第一個係廣州新世界東逸花園，發展商請樂隊演奏德國傳統啤酒節音樂，又有歐洲舞蹈團表演，當然唔少得啤酒競飲，同熱狗競食大賽。
其餘五個樓盤，分別係廣州白雲區嶺南新世界家園、增城市新塘新世界花園、芳村逸彩庭園、二沙島新世界棕櫚園，同順德市順德新世界中心。
港人可以透過雜誌廣告換領入場券。
蘭西
電郵地址：