早排，法國雷諾代理推出全新Laguna車系，有試過車嘅汽車傳媒，包括亞Mark在內，都認為部車設備夠先進齊備之餘，講究嘅真皮座椅同乘坐感，都較同級嘅歐洲車，甚至乎係同等嘅德國車，均有過之而無不及，加上唔使19萬嘅車價，更令人有超值嘅體驗。惟獨品牌問題，起初都擔心去車嘅速度，但經亞Mark打聽後，發覺有唔少香港用家，都以呢款新車作座駕㗎！而部Laguna嘅銷售情況重較預期好㖭！嚟緊佢哋會加推頂級3.0型號同五門掀背旅行車，據知前者售價不過27萬上落，相信想買車嘅朋友自然心中有數啦！然而，早前代理曾經話過有望到港嘅Avantime，由於市場定位有異於傳統豪華轎車關係，相信引入香港嘅機會，就變得微乎其微喇！