九龍倉尖沙嘴擎天半島，五座頂層相連單位，上個禮拜以一千萬成咗。單交易本身就冇乜特別，但牽涉到嘅人就巧合得有如電影橋段。
話說買家係紅磡黃埔花園業主，有日喺區內睇盤，畀中原嘅經紀Michael（圖中）錢「撈」到。游說佢睇擎天半島，結果睇中頂層相連戶。Michael於是搵直屬上司，窩打老道第一分行經理曾錫君（Alfred）幫手，同時又搵埋主區經理協助，喺新九龍六個主區經理中，咁啱只係搵到蔡日基。
當幾個人聚埋之時，個客就即刻認得，蔡日基喺97年幫佢入票認購紅磡海逸豪園，但最終買唔成。而當年蔡生就喺另一間行做。咁都重未夠蹺，原來Michael嘅上司Alferd曾，喺93年都幫過呢個客，買成個紅磡黃埔花園單位。估唔到呢個喺街度搵番嚟嘅客，將幾個相識嘅人再度拉埋一齊，講都唔信，認真有緣，無巧不成書呢句話原來係真㗎。所以從事服務性行業嘅人士，人際關係要打得好，有謂山水有相逢。
中原今次做成咗單擎天半島相連單位，九龍倉當然好高興啦，助理董事黃光耀喺賣緊深井碧堤半島期間，都抽時間嘉許中原劉一姐。
政府又話托市，賣緊深井新盤嘅九龍倉可謂食正頭啖湯，上個禮拜五晚內購，售樓處一直開到第二日凌晨六點鐘，竟然真係有買家肯捱眼瞓坐通宵揀樓，唔通真係政府托一托，好過發展商四圍撲？
細心嘅地產經紀，一早預備大量茶樓點心，不過只款待自己嘅客仔。九倉有見及此亦識做，即時落柯打外賣點心，等其他客仔唔使睇到流口水。
九倉今次在某發展商越區搶客的正面挑戰下，內購仍然熱賣，員工做到凌晨六點，一樣咁開心，重由阿頭帶領之下，高唱電影少林足球嘅歌仔慶祝㖭！九倉啲貨醒，九倉啲貨勁……
港府不斷向中央求助，放寬內地旅客來港是救港方法之一。既然有咁大嘅商機，零售商都嚴陣以待，作為商場大業主嘅信和，就諗到點幫啲商戶。
信和物業管理總經理杜日生話，由10月開始，小西灣藍灣廣場、大角嘴奧海城一二期、屯門市廣場、尖沙嘴中港城、尖沙嘴中心及帝國中心七個商場，只要商戶提名員工，就可以免費參加「普通話服務用語齊齊學」速成課程。
課程係按服務業嘅需要而設計，等商戶員工可以快啲學識，揀喺禮拜日上晝上堂，唔會影響商戶做生意，認真周到。當然，商戶賺到錢，信和都有着數啦。其他商場大業主重唔快啲諗計！
日資百貨公司吉之島，喺香港搞得幾成功，重積極進軍內地百貨業務，租咗佛山「東方廣場」26.9萬方呎做華南地區嘅旗艦店，租期十五年。有個咁大嘅客，發展商佛山東建集團今日就喺商場現址，舉行「廣州佛山東方廣場與吉之島簽約慶典」活動。
佛山「東方廣場」佔地269.1萬方呎，商場有215.3萬呎，係區內最大型嘅主題購物廣場。共有十個主題商場（吉之島就佔一個），樓層由地庫一樓到4樓。預期2005年落成。
嘩！個場大成咁，要行一個圈睇怕都要幾粒鐘。香港商場相比之下真係失色，唔怪得愈嚟愈多港人北上消費購物啦。
喺73年成立嘅地產代理公司美聯物業，最近攞到「超級品牌」資格。據講個品牌十年前喺英國成立，由當地資深市場同廣告業人士擔任委員，按申請公司嘅市場佔有率、信譽、客戶支持度、歷史同整體市場接受程度嚟評分。聽講本港好多公司，例如地鐵同美心集團等，都攞咗呢個「超級品牌」資格。
規劃署早前出咗份《重整新界西北鄉郊土地》報告，指出區內有五十五公頃工業用地，𠵱家重做緊山寨廠。未來該區有西鐵等大規模基建工程，報告建議，繼續保留該批土地作工業用途。但點解政府要咁做，就認真考起。