呢頭政府托樓市，港股守穩9000後反彈上9300，嗰頭隔晚美股弊傢伙，杜指又散近300點，做港股好友，真係多災多難，9月份最後1個交易日，又要多捱一棍。
就算估中美股唔妥，亦好難喺美股Put輪中搵食。美股淡友輪，有4件杜指Put、3件納指Put同埋2件標普Put，冇乜成交，隻杜指Put輪9453叫做每日有幾球易手，但16%以上嘅溢價值博率唔係咁高。
恒指Put輪暫時有睇頭，9444同9448係炒家落手對象。9444明年1月到期，現價35.5仙，溢價3.9%，槓桿率8.7倍。9448亦係明年1月夠鐘，現價32.5仙，溢價5.5%，槓桿率11.4倍。如果賭恒指Put輪，最好見恒指跌番到9000之時，平倉了事。
藍籌備兌輪市場算活躍，不過公司輪市場就成個「八萬五」咁──不存在，得73隻掛牌，上禮拜五只有11隻有成交，又真係冇乜幾隻買得落手。公司輪中，隻陸氏輪360算唔錯，如果唔嫌交投太疏嘅話。360喺04年6月至夠鐘，現價18.8仙，溢價4.6%，槓桿率5.5倍。陸氏（366）最近派半年成績表，半年所賺已經相等於上年全年嘅1.5倍，正股有得睇，隻輪先至有前途。
章盛