上周末小初到珠海打波，撞到成班大經紀，個個面口都唔多好睇，其實原因好簡單，生意唔好錢搵少咗。其中一個重話，情願日日打波唔返工，費事對住個市眼冤。
同呢班大經紀傾開，佢哋話好彩重有班大陸客充撐場面，久唔久抬一大舊錢落嚟炒作，近期佢哋主力炒比亞迪（1211），同時亦炒吓國企股，但佢哋其實搵唔到大錢，其中近期炒得較熱鬧嘅龍發製藥（2898），據聞仍然係維持私人派對，重未散到貨。
小初早排曾推介過龍發，因覺得幕後好有心機炒呢隻股票，所以搭過一輪順風車，賺咗少少錢。
龍發9月頭掛牌上市，到家陣都未夠1個月，股價已經由招股價34仙，炒到上去上周五收市56仙，以近期新股嚟講，升幅都算驚人。龍發產品叫做出名同賣得，但去到金融市場，好多時係另外一回事，近期散戶投資氣氛薄弱，而且又唔見有芬佬落叠買貨，幕後現時將股價愈挾愈高，正所謂位高勢危，相信唔會有太多人敢跟進。
慕容小初