每年中秋，八方都收到唔少禮物，多數都係水果、月餅之類食品；不過今年就有一份好特別嘅禮物，係兩本書。
呢兩本書係法律界傳奇人物余叔韶的著作：《與法有緣》同《法訟趣聞》。余叔韶雖已退休，但仍頗活躍，前幾日就同愛徒余若薇一齊去港大城西讀書會演講，講到港大圖書館可能藏有牴觸二十三條之資料時，引得哄堂大笑。
講番上述兩本書，前者九八年初版，八方早已拜讀；後者推出冇耐，仍屬新書，八方尚未有時間睇，但小小超李澤楷就已經讀完。
原來李澤楷有次搭長途飛機，帶咗本書上機，點知一睇就唔放得手，四十八個鐘頭內由頭到尾睇晒，覺得好正，回港之後買咗百幾套，送畀人分享，其中一套就嚟咗八方手上；咁又真係好過送水蜜桃同枇杷果嘅。
講起李澤楷，佢剛剛又飛咗上北京，去參觀新華網，佢詳細睇咗新華網第一工作平面二十四小時新聞監控區、發展論壇、統一論壇和技術研發部之運作，重對新華網多媒體新聞好有興趣，同佢哋個總裁周錫生交流心得，而新華社黨組成員、秘書長魯煒就負責款客；至於雙方有冇傾生意八方就唔知喇。
傳真︰2623-9278
電郵︰