「阿仔，記住買六合彩喎，今日」，老媽子隆而重之地說。
「細佬，記住買六合彩喎，今期中咗可以一人買層樓」，家姐隆而重之地說。
「Sir,buyMarkSixtonight,50million,manymoney」，菲籍家務助理隆而重之地說。
向來對六合彩不太熱衷，但五千萬……實在太吸引。踏入九龍城的投注站，普通閒日的一個下午，哪裏跑來這麼多的人？師奶若干、穿制服的銀行職員及酒樓侍應若干、放下掘路工程精赤上身的大漢若干、穿西裝打領帶拿公事喼的蛇王若干、菲籍及泰籍人士若干，人人金睛火眼、氣勢磅礡地盯着售票櫃位，一手揸錢、一手揸飛，每人心中有一個夢，一個五千萬的夢。
訪問ＯＬ們：「如果中了五千萬，妳們會怎樣？」
「第一時間贖番層樓，唔使再幫銀行打工。」
「係咁買、係咁買，着到成個Gucci人咁。」
「希望世界和平，然後環遊世界。」
「買起間公司，然後做我老細個老細，日日畀面口佢睇，彈佢沖嗰杯咖啡淡茂茂，再扮唔覺意摸佢籮柚。」
「我會請周杰倫嚟我屋企唱歌𠱁我瞓，我瞓着咗佢都要唱。第朝瞓醒一擘大眼就見到佢，然後我牙都唔刷就要佢同我打茄輪，跟住……」
講得好，有志氣！您呢？您有沒有一個五千萬的夢？